男人的Fantasy (一二零)天下愛情皆無賊「一」
網上資料圖片
現代嘅感情已經變得愈來愈無安全感，資訊發達令到人同人之間溝通易咗，甚至連互溝都已經唔係一件難事。一個五官正常，講嘢唔會流口水嘅男人，拎起部電話隨手用兩三個交友app，已經可以識到一堆炮友返嚟。
有好多額外嘅關係根本就好似發一場夢咁，點解會開始點解會終結都唔知道。只係知道貪就手貪好玩，無諗後果就去做。或者係城市人太空虛，我哋嘅關係因為科技而拉近，最後都係因為科技而走遠，安全感愈來愈少，多做幾手準備就係我哋每一個人對愛情嘅準備。
我經歷過背叛人，亦試過被背叛。試過過癮嘅感覺，亦捱過崩潰到一個點嘅黑暗，如果你問我，我寧願會揀我世界入面從來都無背叛，起碼我唔會對所有人失去信任。
正因為咁，所以我想做一個玩命嘅遊戲，希望每個人睇完之後，呢個世界可以小一啲背叛。
我教你哋睇，另一半有冇嘢呃住你。
好多人話，一個人有心呃另一個人嘅話一定呃到。而我就話，一個人有心要睇另一個人有冇嘢瞞住自己嘅話，點都會有方法。
第一樣，見微知著。幾聰明嘅大話都會有破綻，破綻唔一定係赤裸裸咁出現喺大家面前，有可能係一啲好細微嘅位置入面，我哋都可以睇到多少端倪。手提電話係一樣好好嘅示範，一個人點樣放電話，放嘅時候係向天定冚埋，會唔會長期教震機，又或者係覆訊息時會四十五度角斜斜地咁移開，呢啲所有所有嘅小動作，都會係大家搵到自己想要答案嘅最好方法。
手提電話長期跟身嘅、任何時候都唔開聲嘅、就算放你面前部電話都係冚埋甩唔到屏幕嘅，呢幾點大家都要注意，因為呢啲習慣其實無咩意思，如果你另一半長期做住一啲無咩意思嘅嘢，就即係話俾你知，呢一樣嘢絕對唔係無意思。呢幾樣情況係一個好簡單嘅警號，即係話俾你知，佢電話隨時會有人打俾佢，或者係send訊息俾佢，而佢唔想俾你睇到。
呢個人到底係邊個，就你自己慢慢去諗。當然佢哋會話每個人都有自己私隱，企喺道德高地上面俯瞰你，問你點解唔俾空間佢。你可以聽佢講住先，因為需要得咁多空間嘅人，一定會有好多空位俾你發現，佢到底有咩瞞住你。
今個星期大家不妨留意住另一半嘅電話，有咩事都唔會動刀槍住，下個星期聽埋我講先慢慢處理。
薛可正Facebook Page
http://www.facebook.com/sithoching