男人的Fantasy (一二零)天下愛情皆無賊「二」
網上資料圖片
上一集講過伴侶嘅電話可以睇到端倪，大家有冇返去留意吓？不過講明先，好多嘢唔可以單一咁睇，就算你另一半好似我上星期專欄咁講電話不離身，都唔好蓋佢棺定佢罪先。畢竟都係一段有血有肉嘅愛情，唔可以太草菅人命嘅。
睇完電話，我哋講下習慣。兩個人喺埋一齊嘅日子耐咗，點都有啲習慣係一齊去做。會定埋同一日去放假？又或者係放工一定要去接大家？呢啲慢慢習慣嘅習慣，就好似每對情侶間嘅雞肋咁，做又唔係，唔做又唔慣。又怕俾另一半投訴，慢慢形成為做而做。
而當一個人有異心時，呢類無必要嘅習慣，就會變成第一樣想改變嘅事。留意一下，對方會唔會試圖改變習慣，開始唔想接你收工，又或者係爭少少時間都唔想等你，硬係要自己走先。就算最後佢返屋企都好，感覺就好似想騰出私人時間，去做一啲私人嘅事。
喺大家既定要見面嘅時間，佢仲會陪你食飯行街睇戲唱歌。但當離開呢啲大家都開始乏味嘅行為，你會感覺到對方「想向外跑」嘅感覺就會愈來愈濃。無第三者嘅「感情轉淡」多數都只會原地踏步，只有出現挑戰者時，對方先會有主動離開你距離嘅舉動。
如果你問我，呢啲情況有冇得搶救。我以一個過來人身份話俾你知，係無。一個人當被「新鮮感」攻佔時，個腦就會神智不清，眼前睇嘅所有嘢都會改變。個別意志力低嘅，仲會出現幻覺，覺得自己擁有一切嘅嘢都唔好，想摧毀所有，去迎接嗰個「新鮮人」。
去到呢個地步，一段感情守唔守得住，就睇心靈出軌者嘅定力，對愛情觀察嘅通透度；睇新鮮人嘅威力到底有幾大，係真係強大對手，還是只係一現嘅幻覺。當然最重要就係你對呢件事嘅觸覺，會唔會及早發現，發現後你嘅處理會如何？
係咪覺得好恐怖呢？講到一段感情點解好似話變就變咁，其實只係好正常嘅事。感情本來就係無承諾嘅虛無，兩個人喺埋一齊本來就只需要靠一個眼神，由嗰零點幾秒時間所產生嘅感覺，去支配一世人嘅感情空間，根本就係廢話。
愛情要經營，呢句說話好多人識聽但唔識解。但如果我話俾你知一盤生意要經營，你就可以影像化地了解，到底「經營」呢兩個字嘅意義，知道要做嘅功夫到底有幾多。如果一段感情經營得好，大家都知道珍惜呢段感情而且相信呢段感情，有好多事都唔會發生，有好多事都唔會完結。
所以當一段感情出現問題時，兩個人都有自己嘅責任。如果你話你對呢段感情已經做足一百份，咁你嘅責任，應該就係你第一秒已經揀錯人。
薛可正Facebook Page
http://www.facebook.com/sithoching