2017/03/24

男人的Fantasy (一二一)「有得玩唔通唔玩?」

2017_03_23_薛可正MenCLub Column
網上資料圖片
 
後生時經常都有呢個感覺,因為由細到大,「十大廢話榜」入面「人不風流枉少年」呢句廢話同「船到橋頭自然直」一樣,都有好高嘅出現率,所以成日個心都會諗,後生唔玩?老咗你就玩自己喇。
 
後來有句網絡名言「再不瘋狂,我們就老了」,雖然意境一流,但意思接近,都係用嚟荼毒呢個世界上嘅年青人。
 
喺呢個涉及自身嘅巨大原因下,我開始周圍玩。有一段時間個人狀態比較好,靚仔啲瘦啲肯打扮啲,幾乎每一個自己覺得合格嘅女仔,都會發吓訊息,玩吓msn 。那年頭仲年青,樂於亦擅於建立所有關係。
 
互聯網啱啱普及,嗰個時候識女仔易到不得了,政府廣告都仲未有叫人小心網上識朋友,所有人都對用呢個渠道去識朋友非常好奇,男男女女都非常主動,完完全全就係另一個新世界。
 
一來二去,發生過好多連自己都唔記得嘅霧水情緣,有玩過人亦都有被玩過,無人對感情認真,因為喺呢種世界入面,無人夠膽認真。
 
慢慢開始,「玩」嘅感覺消失,我開始覺得攰,開始覺得感情唔係咁樣對待,用一次肉體關係去產生一段感情,再因為「只得肉體」呢個原因去了結一段關係。每一個人都好似走馬燈咁經過,偶爾遇到適合嘅,同佢連「將來」呢個問題唔好話討論,就連諗都唔會。「我哋上網識㗎咋!諗將來?」
 
真係諗起都面紅。
 
呢個時候,我知道自己開始求穩定,我開始唔年青,我時間開始少,我開始驚。
 
我唔知向來孤獨嘅我係唔係怕老來無伴,我只係唔鍾意睇唔到啱嘅感覺。當時間唔夠,我哋本能要用安全感去彌補。
 
我開始唔享受「開始關係」,好多事已經變成輪迴咁,開始時諗幾時完,完結時搵吓個人,我慢慢探討,呢一種玩係玩人哋定玩自己。
 
以上講既,依舊係人類黑暗面,好少人會承認,但好多人會實踐。呢種將關係輪迴嘅方法就好似止痛藥,醫得你一時既頭痛,但長期服用總係有莫名既副作用,會有咩徵兆唔知道,但總係覺得周身唔舒服,想脫離呢種心癮。
 
穩定而安心可以令人生活正常快樂,特別係事業衝刺嘅男人,背後有個永遠唔會離棄你嘅人係好重要。重要第一步在於,個女人願意全心愛你,你都要有膽相信佢真係會咁做。
 
依家有好多年青朋友再問我:「正,人不風流啦啦啦呀。」
 
我會答:「我開始老,都係中藥嘅固本培元比較適合我。」
 
薛可正Facebook Page
http://www.facebook.com/sithoching

COMMENT