男人的Fantasy (一二二) 唔好咁敏感啦
網上資料圖片
「你唔好咁敏感啦，做嘢之嘛。」我女朋友阿悠好溫柔咁拖住我隻手同我講，因為十分鐘前我發佢脾氣，原因係我去接佢收工時，見到佢同個男同事傾偈時隻手你捉吓我時又我捉吓你咁。我稍稍有少少黑面，佢就好成熟好正經咁同我解釋。
乜嘢叫敏感呀大佬？你兩個啞嘅要有手語溝通呀？定你兩個係ET要第三類接觸先可以知道大家諗咩？唔係你哋兩個身體接觸有咩問題，係點解要用呢個方法先可以講到你哋想講嘅嘢呀。
扮乜春鬼妹仔？扮乜嘢不拘小節？明明就係黑頭髮黃皮膚，以為去間屋邨髮廊染個二佰一十八蚊嘅MK金就可以沾染到外國嘅文化呀？好心妳啦，妳連坐飛機去英國要幾多個鐘頭都唔知呀，雖然我都唔知。
女人就係咁煩，明明自己想做萬人迷，周圍收兵又唔應……咩話咩話？妳話妳唔係咁呀？唔係就自己檢點少少，唔好成日自拍放上網，好似萬人斬咁係人都睇到妳個風騷樣，唔使向妳無興趣嘅男人展示呢一面，無必要亦唔好睇。
阿悠俾我鬧鬧吓，問我做咩咁嬲？喂點會唔嬲呀？上次我喺公司係咁意搭一搭阿Mary膊頭之嘛，我俾妳鬧咗我幾耐呀。又問我隻手係唔係中咗「古惑的槍」，係唔係成隻手無力要搭住人膊頭，又上facebook個status度留咗句「死狗公，見女就狗衝」，幾押韻，幾有文彩呀，宜家先叫我唔好咁敏感？
平時出街影相唔放我都已經算，次次去親旅行都好似自己一個去咁，相又識叫我影，影完又要扮自拍，宜家妳當我係人定係自拍神棍呀？妳話我敏感？我就係唔夠敏感，唔夠敏感先會俾妳呢啲咁嘅死港女騎牛搵馬，唔敏感先會成日好似傻仔咁俾你點，個個月用大半份糧去湊仔，但自己就做個隱形人。
我夠敏感就一早叫妳食屎，唔會俾妳氹到我陪妳去日本，仲要買咗我五皮幾嘢先離得境。男人就係唔敏感唔計較，妳哋呢啲套路多多嘅死港女先有生存空間，如果我哋真係敏感，一早一腳伸妳地落街再翻兜Mary啦。
過主呀依家我叫妳，唔好再搵我呀。
薛可正Facebook Page
http://www.facebook.com/sithoching