男人的Fantasy (一二三) 「年紀愈大，男人愈唔鍾意鬧交」
網上資料圖片
一段感情入面，一個成熟嘅男人係唔會鍾意鬧交。
只要兩個人爭執一開始，其實所有嘅劇情同套路，對一個有經歷嘅男人嚟講都係耳熟能詳。大家點樣爭持，然後任何一方開始愈嘈愈大聲；又或者係其中一方突然轉身走，另一個追上去、拉扯、大叫，再用最傷害嘅說話去插死對方。
如果你用第一身嘅角度去睇，兩個當時人喺嘈得最激烈時，個心只係想對方死，我諗你哋都唔會覺得誇張，的的確確係想對方死，起碼維持五秒。
咁多年，男人點會未試過叫對方死，又或者係對方叫自己死時，真係自摑、撞牆、扮跳樓同衝出馬路。只係每一次你癲完之後，會慶幸自己無做錯事，喺最癲時你無傷害對方，又或者係無俾到太大傷害自己。
因為喺怒火完全熄滅時，你就會知道最嬲最癲時嗰個自己，係幾無謂同幾唔需要。
年青時總係用「離開」去希望對方「挽留」，老咗先知呢個係一個弱智到不得了嘅諗法。會留你嘅人唔會俾你示意離開，俾你離開先挽留嘅人本來就唔會為你挽留。
兩個人，你來我往，拳來腳去，為嘅本來就係安安靜靜快快樂樂咁繼續生活。我知道兩個人係會有好多磨擦，你化妝太耐，佢又出去玩太多，兜嚟兜去都係問緊同一個問題：「你到底有幾愛我？」可唔可以愛到化妝化快少少唔好要我等太耐，又或者係愛我愛到唔好出去玩咁多。再昇華少少嘅，可唔可以愛我愛到，俾你部電話我睇呀？
成熟男人合埋眼，一堆又一堆因為嘈交而留低嘅往事穿過個腦，然後再望住眼前仲係同佢嘈緊交嘅女人。呢個時間男人會突然無哂火，佢想行前攬住呢個女人，話俾佢知：「我哋唔好嘈喇，我咩都可以改，有妳喺身邊，真係好。」
係咪好唔合常理？係咪覺得好不可思議？可能好多女人喺呢個時間會講「我條仔邊會咁丫，佢次次都鬧到我仆街」「我次次想攬返我條仔，佢都推開我呀」「佢咪係走，我咪係追嗰個囉」
唔緊要呀，你無錯呀女人們，你揀錯咋，再揀啦八婆。
薛可正Facebook Page
http://www.facebook.com/sithoching