網上資料圖片
 
朝早七點鐘，樂仔電話入面嘅鬧鐘就響。一起身，佢就覺得全身都酸痛，因為成晚佢都坐喺梳化度瞓。樂仔再諗真少少，尋晚佢同女朋友Jenny鬧交，最後唔小心瞓著咗。
 
「死嘞…」樂仔拎起電話望一望，見到Jenny全晚send咗45個短訊俾佢，包括…
 
「費文樂，我覺得你唔愛我，你完全無理過我感受。」
「我知道你忙，但你幾耐無同我食飯你仲記唔記得？」
「你知唔知我哋嘅相處出現咗問題？點解你總係掛住做嘢，從來都無問過我需要啲咩？」
「瞓著咗？嘿，你竟然瞓得著。」
「我對你真係好失望。」
「我哋分手啦。」
 
讀完Jenny呢45個短訊，阿樂深呼吸一吓，再睇到上司半夜send咗三個短訊俾佢。
 
「九點鐘到我個房，今日十二點同大老闆個會有新idea。」
「前晚份計劃書做好未？著緊啲個客好重要。」
「今日記得唔好遲到。」
 
阿樂睇一睇個鐘，已經係七點十二分，要由屯門出到中環，佢要趕得到七點半嘅巴士。佢好快咁衝入廁所洗面，唔夠三分鐘，電話就響，係Jenny。
 
「費文樂，你已讀不回係咩意思？」
阿樂其實知道Jenny大概要指責嘅罪名有邊幾項，所以一路換衫一路都無出聲。
 
「你講嘢啦，到底你想點呀？成世人都係唔講嘢，我同你講你又唔應，我好辛苦呀。」
「Jenny，我趕住返工，不如我上車先打俾妳好嘛？」阿樂嘗試平靜，佢喺呢段感情入面一直都嘗試平靜。
「得你要返工呀？我唔使返咩？」
「嗯……咁不如Lunch傾好嘛？」
「你鐘意啦。」
 
Jenny掛斷電話，阿樂好無奈咁用最快速度出門口。最後巴士趕得上，但只係剩返企位。屯門公路每朝塞車，就好似東邊出太陽咁，係定律嚟。阿樂爭取時間做功課，希望可以喺老闆面前爭取表現，將老闆交俾佢嘅工作做好。突然，佢又收到Jenny嘅短訊
 
「我覺得你已經唔愛我。」
 
阿樂望住個短訊兩秒，然後換換手，用左手拎住公事包，右手扶住巴士欄杆，繼續企出中環。尋晚坐住瞓，加上企足一程巴士，返到公司嘅樂仔，已經好攰。
 
九點鐘行入上司房開會，阿樂一直捱到十一點，期間Jenny打咗三次電話加18個短訊俾阿樂，但阿樂只可以簡單咁用「OK」「知道」「嗯」去回覆。
 
「你到底有冇聽我講咩呀費文樂？」
「嗯。」
「我忍夠喇，你俾我走啦好嘛。」
「知道。」
「到底你出面係唔係有第二個。」
「知道。」
「你可唔可以唔好問非所答呀？」
「OK」
 
捱過上司嘅朝早會議，求其食一個麵包之後，就係大老闆嘅會議。阿樂索性將電話熄咗，可以俾自己專心咁開埋個會。佢喺呢間公司已經做咗八年，人工係兩萬五千蚊。佢希望今年可以再升一級，人工有三萬蚊，佢可以同Jenny結婚，跟住喺屯門買一個三百五十萬左右嘅物業。
 
佢同Jenny拍拖五年，大家都就快三十歲，阿樂知道男人可以等，但女人唔可以。佢好努力咁每日工作，用自己所有嘅時間，去追以前失去嘅時間。
 
完成會議之後，阿樂開返手提電話，正打算打電話俾Jenny時，佢收到妹妹嘅電話
 
「阿哥，你出門口時無收好梳化個墊腳位咩？阿爸唔小心撞到跌親呀，依家入咗醫院。」
 
阿樂好心急咁打電話俾媽媽，最後知道爸爸情況唔太差。兩位啱啱退休嘅父母，亦係阿樂要努力工作嘅原因之一。
 
「對唔係阿媽，我收工會嚟睇阿爸。」
 
阿樂收線之後繼續工作，但佢個腦同身體都已經好攰，電話上面嘅WhatsApp group唔知幾耐無睇過，好多朋友都話好耐無見過佢，佢眼前就係工作工作工作，有時甚至忘記今個係幾多號，聽日到底係星期幾…
 
阿樂乜嘢都唔記得，只係記得要冷靜。
 
俾Jenny鬧時要冷靜，俾上司時時刻刻加重工作時要冷靜、開會時大老闆要鬧人，幫上司食完死貓佢又要冷靜、做嘢做到唔夠時間食午餐，完全無哂私人時間要冷靜…
 
阿爸入醫院佢唔敢請半日假去探至親時要冷靜，
Jenny每日都怪責佢時，佢都要冷靜。
 
因為佢知道，佢嘅情緒已經好唔冷靜。
 
夜晚八點放工，阿樂落到公司樓下，Jenny已經企喺大堂門口等佢。阿樂知道Jenny會嚟，因為Jenny性格一向都係咁，慣性投訴、慣性怪責、慣性唔體諒，但慣性唔會離開阿樂。
 
「費文樂，我哋分手。」
阿樂望住Jenny，將佢一抱入懷
 
「對唔住，我太忙。」
 
Jenny攬住阿樂，摸摸佢個肚
 
「個肚仔瘦哂，唔使講梗係未食嘢啦，我同你去食嘢啦。」
 
「嗯。」
 
薛可正Facebook Page
http://www.facebook.com/sithoching

Uncategorized 個回應 | 5,442 個已瀏覽 |