男人的Fantasy (一二五) 愛情搖搖板
網上資料圖片
「我好辛苦，我好辛苦呀。」
阿June向男朋友Hugo發脾氣，Hugo習以為常，靜靜咁企喺阿June面前，聽佢嘅連珠炮發。
「我真係做嘢做到好攰。」
「我覺得好大壓力。」
「每個人都要我做，仲要個個都趕，個個都俾說話我聽，我就嚟頂唔順喇。」
「俾我靜靜。」
June講完就轉身離開，Hugo望住佢苦笑咗一下，然後慢慢咁跟住喺佢身後面一路行。June由佢發脾氣嘅信和門口，一路沿住彌敦道往尖沙咀方向行。一路行，Hugo一路望住June嘅背影，一路諗返起佢所講嘅辛苦。
期間，Hugo嘅電話不斷有訊息響，Hugo一路行，一路聽。
「Hugo，今個月你條Team啲數點呀？明知打緊仗，班同事話你一收到個電話出咗去，喂，上心少少好無呀？」
「Hugo呀，老闆搵過你呀，條仆街Peter三秒都唔夠就答老闆你出咗去蛇王呀，你自己執生呀。」
「仔，包租婆打電話嚟話下個月加租喎，你老豆叫我問下你會唔會辛苦呀。」
「兄弟兄弟，十萬火急，上次幫我買嗰幾支膽，可唔可以今晚拎俾我，我想今晚試機呀。」
Hugo唔係一個好脾氣嘅人，以前都試過因為一啲生活壓力問題，而同阿June鬧大交。有時諗返起，Hugo都會忍唔住笑。
「大小姐呀，我都好大壓力呀，妳估得妳做嘢有壓力呀？」
「係呀係呀，我係大小姐呀，我最難服侍最麻煩，唔好理我囉。」
「妳都白痴。」
「你又鬧我白痴？」
「哈哈哈。」Hugo成個傻仔咁一邊回憶一邊笑，完全無發現阿June已經轉身企喺佢面前。
「你笑咩呀？諗起邊條女呀？」
「痴線，哈哈。」
「講呀，諗起邊條女呀。」
「諗起條白痴，哈哈哈。」
June當然知道Hugo說話嘅意思，一拳全力打落佢心口係Juno嘅回應。
「喂，痛㗎。」
「白痴都知痛啦，唔痛我打嚟做咩呀？」
「發完脾氣喇？」
「發完喇，好肚餓，去食嘢。」
兩個人就係咁拖住手，一齊向旺角方向返過去。隨住兩個人嘅背影愈走愈遠，呢個時候畫面應該會有一堆字慢慢咁喺底度升上嚟：
「兩個人的相處時的脾氣就像搖搖板，當一個人升上去的時候，另外一個應該作出遷就。只要你降低一點，給對方上得愈高，看得愈開，可以透透氣，也可以放縱地消耗一下自己的負能量，當對方降回來跟你成水平的時候，你自然可以看到一個很好的Ta。不要在對方升起時勉強跟隨，因為永遠只可以一個上一個落，就像人生也就像愛情，
有高有低，也有來有往。」
薛可正Facebook Page http://www.facebook.com/sithoching