男人的Fantasy (一二六)飲杯酒
網上資料圖片
「喂，唔好飲喇。」星林拎走我手上嘅杯，再隨手將一塊生果放入我口裡面。生果係甜嘅，但我覺得太無質感，幫唔到我呢一個時刻想要解決嘅事。我一手搶返杯走，再一啖倒晒入個口度。
「樂哥，好小事咋係咪呀？」星林向住我攤攤手，有種不屑但又關心嘅感覺。
我叫周子樂，同女朋友Yumi分咗手二十七個鐘。
「小事？咁飲杯酒都係好小事之嘛。」我無望住星林，我唔想同佢拗任何需唔需要飲酒，或者愛情有幾大件事嘅觀點。
我咩都唔想諗，快快手飲醉我就可以瞓覺。
「點解你唔可以理智少少？女人無咗咪搵另一個，你工又唔返，晚晚落club又叫女又開酒，張張單都成皮嘢，你好寂寞咩？你要女人嘅洗幾百蚊去叫完雞咪返屋企瞓囉，你已經周身卡數喇樂哥。」
「我唔係要叫雞呀星林哥…我叫你出嚟…唉…算喇。」
「我知道你心情唔好，但可唔可以做啲理智少少嘅做法呀？」
「點先為之理智？」我坐直個身，望住星林。
「正面啲囉，有唔開心就去做運動，無女咪使幾百蚊去叫雞囉，叫雞呀，再唔係使幾千蚊搵個乜嘢PTGF陪你行街睇戲，使乜坐喺度飲埋啲傷身嘅嘢？目標為本好唔好呀？」
「嗯，好建議。」
「咁我哋走啦，唔好用啲無謂錢。」
「但我想飲埋先。」
星林拉我起身，我又坐返低。我喺呢間CLUB已經連續第三晚，搵咗一個叫suki嘅小姐陪我，都已經係第三晚嘅事。如果你問我點解會呢個狀態，可能就係yumi對我嘅態度令我變成咁。
做咗幾十年人，拍過好多次拖，有經歷所以有經驗。一個人打算離開自己，你會感覺到。我可以話俾你知，呢一種感覺係天下間最討厭嘅事嚟，嗰一種好快被人離棄嘅預兆，係最難以招架。
呢一種被離棄嘅感覺，會勾你人生入面所有被離棄過嘅畫面，正面衝突根本就係一件折磨自己嘅事，因為你永遠鬥唔過「感覺」呢個魔鬼。
我搵一個熟悉嘅地方，搵幾個熟悉嘅人，每一日可以俾我不停咁飲，因為一路飲到個頭痛我可以唔使諗太多無謂嘅事。我見到最好嘅朋友，同一個用錢換返嚟坐我身邊嘅女仔，係我知道佢哋都唔會走，唔會突然離棄我。
個頭好痛，我諗唔到嘢喇。
最後一句，我知道星林所講嘅嘢都係啱，身為一個唔需要飲酒嘅人，係完全有道理講出一返又健康又正面嘅訓話。我會抄低哂佢，下次再同星林講，喺佢又俾女朋友飛嘅時間慢慢講。
薛可正Facebook Page
http://www.facebook.com/sithoching