男人的Fantasy (一二七)龜密
網上資料圖片
呢個年紀，同一班老死出嚟食飯，話題點都離唔開湊仔。
幾年前約食飯簡單得多，幾個男人，一個地方，買兩打大啤就先到先等。邊有話邊個遲到邊個早到，早到就食先，叫到一枱都係，唔係串燒就係打冷。遲嚟嘅自己知自己事，要食大眼雞尾，又或者係夾到碎屍咁嘅茄子，一樣大大箸咁夾入口，唔理有邊個口水尾都食得開開心心。
次次食飯，無凌晨三四點都唔願散。其實傾嚟傾去都係嗰幾樣。日頭返工太多討厭嘅人，搵一班有親切感嘅朋友同兄弟，去重覆講住一啲大家仲識笑嘅事，已經係好好嘅回復。
好多人睇到呢度，一定講呢啲就係「男人的浪漫」，但我幾討厭呢啲濫用咗嘅所謂潮語。連阿婆都識講嘅，真係好難再講得上「潮」。恰當少少，求其叫做「龜密」仲好。一班龜公縮埋喺個角落頭度講秘密，中。
但每一個人又或者係每一班朋友都會有唔同階段，總有三幾年時間大家會約唔齊人。跟住慢慢就會有成員離開，有人加入。有人會呻大家嘅友情返唔到以前咁，計我話你都低能，日日瞓隔離嘅情侶都會有山高水底啦，何況係一班日忙夜忙嘅麻甩佬。
喺你地最黃金嘅十年，你哋會拍拖，結婚、生仔、創業、失戀、離婚等等，無可能每一個高低都會有大家喺身邊，因為每個人嘅路口唔同，我轉咗份返夜晚嘅工，其實就已經唔見咗好多同朋友見面嘅時間，但呢份工又可以一個月俾我多一皮嘢供樓，所以有好多取捨都係必需。
少咗見朋友係唔係等如無咗班朋友，就睇你同大家嘅感情有幾深。回魂夜個周星馳話齋，個信念一鬆嘅時候，好多嘢都會控制唔到。你對呢份友情有幾肯定，會成為你哋仲會唔會聚埋一齊嘅一份決定。
近兩年，好多朋友都做咗爸爸。偶爾一個飯局，成員已經唔同晒。我哋唔會再一枱都係啤酒，由食串燒到食一啲比較適合小朋友食嘅晚餐。唔好再坐大排檔喇，搵個舒舒服服但係風口位唔好咁凍嘅。七點你哋班人好嚟到喇，我個仔眼瞓要瞓喇。
我哋唔再講太多男人話題，起勢咁捉住個一年未必見到兩次，但真心覺得佢好可愛嘅世侄玩。叫我叔叔定哥哥，又或者叫邊個阿嫂做姨姨定阿婆。形式一樣，對白全改，但我哋一樣開心。
愛情要歷練，其實友情都係。唔好見少一兩年就覺得大家友情不在，因為喺某一日，你哋因為投契先會成為朋友。如果你願意，呢份投契依然會一世跟住你哋嘅。
薛可正Facebook Page
http://www.facebook.com/sithoching