男人的Fantasy (一二八)喇叭女人
網上資料圖片
以前聽過人形容一種女人，就係把口唔收，有咩事都要周街講。
但我覺得呢個講法係唔成立，因為一個人除咗痴線之外，無咩可能會周街同人講佢自己想講嘅嘢。正所謂人要面樹都要皮，佢係口疏，但應該唔係弱智。
但自從有咗互聯網之後，我開始信呢個講法。以前成日見啲女人喺Forum上面，用好多假戶口，去講自己身邊所有事。有公事有私事有人事但最多就係性事。但諗諗吓又覺得正常，當年仲係互聯網人事未太發達嘅年代，見個網友都好似好大罪咁。人與人之間嘅距離，其實體現喺現實世界入面，仲未算太近。
直到Facebook嘅出現………
「夠膽你以後唔好搵我，我唔一定要取悅你。」
有一日見到我朋友阿雄女朋友阿姿嘅Facebook有呢個status，立即就打俾阿雄。
「你同阿姿鬧交咩？」
「係呀，你又知嘅？」
「我睇佢status嘛，佢仲話佢唔一定要取悅你，雄哥有咩睇法？」
「仆街正八婆嚟，叫咗幾多次唔好乜都拎上網講。」
阿雄好少講粗口，喺我面前鬧阿姿仲係第一次。但宏觀咁去睇阿姿嘅行為，鬧佢仆街係有少少唔客觀，但鬧佢八婆呢兩個字真係唔過份。
阿雄話俾我知，原來佢哋鬧交嘅內容，只係阿雄要加班加到十點，返到屋企佢見阿姿原來一早煮到成枱都係餸，但從來無通知過阿雄。
最後阿雄講下次如果佢煮咗飯，可以早少少同佢講聲。
阿姿答佢，呢個係驚喜，如果你唔中意呢個驚喜，ok fine!
望返阿姿嘅status，已經出現一班阿姿一早知道會出現嘅跟車港女：
「姊妹我撐妳」
「男人係咁，唔需要理佢哋。」
「今晚飲嘢啦baby。」
「妳值得更好，姿姿。」
多到好似臨記咁嘅朋友不斷走入阿姿個status鬧，由唔開名鬧到開名，再由生活事鬧到私人事，件事愈搞愈大，最後搞到阿雄叫分手。
「我唔明呢啲女人諗咩，同最親近嘅人鬧交，反而去搵一班同自己平時完全唔close嘅人去幫手鬧。」阿雄問我。
「四個字形容哂，個腦裝屎。」我答
「精警。」
「多謝。」
存在感每個人都需要，但絕對唔會係用糾黨同踐踏變出嚟。女人修養有好多種，把口就係其中一個必修科。
相比起嚟，我諗我都係中意安安靜靜識解決問題嘅，就算脾氣大啲都無所謂。
薛可正Facebook Page
http://www.facebook.com/sithoching