出軌，但唔好殺人。
 
呢個年代，伴侶之間嘅出軌機率，我個人認為百份比已經去到……嗯，你哋可以唔同意，但我覺得已經有八成以上，仲要已經係保守估計。
 
我成日都強調，科技發達，無論係溝通嘅工具，定係做假圖嘅威力，都好容易將「出軌」呢一件事簡易化。呢一種文化嘅演變，對我哋人類普遍偽善嘅道德觀上，起咗一個非常大嘅衝擊。
 
即係去到一街都係出軌經驗嘅人群當中，我哋依然要抱住個舊有嘅偽善道德觀示人，定係強勢咁去衝擊人類一直以嚟都奉行嘅一夫一妻制最好？
 
既然出軌已經變到成行成市咁，咁出軌係咪已經變到無咁討厭？我個人認為又唔係，需知世上最可貴嘅嘢就係「層次」，我哋習慣搵到所有事入面嘅層次，你嘅世界觀自然就會大好多。
 
正所謂，出去叫雞又係出軌，溝咗老婆個姊妹都係出軌，但其實分別又大唔大呢？
 
答案係大嘅，因為一個男人你就算叫雞，出去搵乜春PTGF都好，呢啲只係你單方面破壞你同你另一半嘅感情。但如果你溝嘅係老婆個姊妹，你仲破壞緊你老婆成個世界。
 
感情出事就友情補位，呢啲永遠都係千古嘅定律，好少人失戀會搵老豆老母傾，因為自古親情友情愛情就有不同職責不同位置，你依家炸人基地都已經夠無良，仲要斷人後路？唔係趕到咁絕呀吓？
 
好多人出軌原因係貪玩，貪玩貪到炸咗身邊人成個世界咁滯，咁又真係幾好玩。呢個世界盜亦有道，你可以賤格你可以仆街，呢啲屬於個人修養嘅事。但去到因為玩而毀滅其他人一生，你哋有冇諗過，其實做人可以自私到一個咩程度？
 
愛情入面，最重要唔係長情，而係同理心。如果你驚俾人用把刀斬，記得唔好因為玩而搵把刀拮人。
 
一啲都唔好玩。
 
薛可正Facebook Page
http://www.facebook.com/sithoching

Uncategorized 個回應 | 7,156 個已瀏覽 |