網上資料圖片
 
啱啱過咗三十八歲生日，望住日曆，成日感覺到人生已經過咗一半。不過死我其實唔係好怕，只係覺得人生如果無咩變化，就算俾你活到齊頭一百歲都係白活。
 
但係求其搵啲手藝去學，又或者係搬間屋，都好似唔能夠喺呢個「年紀」做到變化嘅效果。我諗咗好耐，都係諗唔到，最後身邊有一個人同我講，如果我十一月十號前，可以減到好似彭于晏咁，佢就請我食一餐大餐。
 
「彭于晏咁」到底係一個乜嘢概念，我不禁搵返套《激戰》出嚟睇一睇，睇完之後，再上網搵吓減肥節食健身嘅食譜，嘩…啲乜嘢唔可以食碳水化合物呀、食雞唔可以食皮之類之類嘅做法，我呢一世仔真係諗都未諗過。我起身最中意食茶記沙嗲牛公仔麵加多杯凍華田，午飯晚飯食咩都好都會食到十二分飽，一個唔小心去到半夜仲未瞓，就會著住對拖鞋去麥當當等佢個早餐通粉加多塊芝士先過癮。
 
相比之下，我跟住落嚟要食嘅嘢可以話同屎無分別。啲唔准用油煎嘅柴皮雞肉同埋無味西蘭花，無味加埋無味最後都係無味，但係正正係咁，我先覺得好玩好正，食完全唔同嘅嘢，食啲好似受苦咁嘅嘢。最後習慣佢，喜歡佢，再喺佢身上得到你想要嘅效果，呢個就係我想要嘅感覺。
 
人唔可以太自由，如果你真係好幸運地可以好自由，請你自虐地俾返少少約束自己。人有絕對自由係最無自由，我講緊嘅係個心同份精神。有賽道嘅人生先有目標，一塊大草原俾你狂跑三日，最後你會唔知自己想跑去邊，目標又喺邊。男人最忌就係咁，最易迷失都係咁。
 
七月尾將會有一個新工作，希望到時可以用一個我想要嘅新形象示人，去展示一下自己嘅另一面，亦考驗一下自己嘅意志力。
 
身為男人要去照顧好多人，點樣都係健康啲、瘦啲好。
 
薛可正Facebook Page
http://www.facebook.com/sithoching

Uncategorized 個回應 | 5,394 個已瀏覽 |