男人的Fantasy (一三一)《知遇》
網上資料圖片
一個男人，就算幾叻都好，如果無人幫你開第一度門，就算你識飛上天都係無用。
我成日都話，每個人一生入面，點都會有個人生教練。呢個教練會教你點行你嘅人生路。遇到挫折唔好灰心，返工俾人篤你背脊唔緊要，無啦啦俾人炒都唔緊要，你條女出軌兼拎晒你副身家走路，都唔緊要。
人最緊要就係自己，因為好多事，只要你忍一忍手，過咗個有效期，就算天大嘅事，你都知道最後只會係小菜一碟。
呢個人生教練基本上係教你防守，防守人生路上所有攻擊，不論合理定唔合理都好。做好防守，跟住就係進攻。
就好似開首咁講，我就算你天生係一個歌神，無人俾一個舞台你，你呢一世都要匿喺廁所入面開屎坑演唱會。而喺你人生路上幫你第一扇門嘅人，你一定要永遠緊記。
無呢個人，你唔會跳到去另一個階段；無呢個人，你只會繼續做住一啲連自己都覺得麻木嘅事；無呢個人，你永遠都唔會發光。
但呢個人，唔一定係你心目中嘅英雄，佢唔似教你防守嘅人生教練咁，將你人生扶持得四四正正。呢個人只係幫你開一道門，無錯，佢好可能就只係做咗一個動作咁大把。
又可能，佢開呢道門俾你，只係為咗自己。可能係利用你，可能你係佢及時雨，可能佢呢個動作本來就唔打算係幫你。
但唔緊要，開咗呢度門已經係最重要。你往後所有所有嘅一切，都係因為呢個動作而出現，你嘅成就好可能因為呢個人一時私心而發生，現實就係搞笑，但唔緊要，最重要係結果。
到有一日，你會發現呢個其實唔係你想像中咁有高度，呢個人可能極度私心，甚至唔係一個值我敬佩嘅人。唔重要，由頭到尾你對佢產生敬佩，只係你一廂情願嘅諗法。你睇唔清楚佢，只係你嘅修為唔夠。
呢個人最後如果教識你一個道理，其實都係一件好事。所以唔好仇視人生中每一個人，每一個人喺你身邊走過，會拎走你一啲嘢，跟住又放低一啲嘢。
佢係你嘅過客，你亦都係其他人嘅過客，別太著緊。
薛可正Facebook Page
http://www.facebook.com/sithoching