網上資料圖片
 
有冇發現好多男人，都唔多中意用銀包嚟裝錢。佢哋多數都係將啲銀紙放喺個後袋，跟住每一次俾錢時，都會從一大堆銀紙入面搵一兩張十蚊廿蚊紙出嚟。你哋覺得麻煩，其實咁做係特登。
 
我細個時都有用銀包嘅習慣，買一個又靚格隔又好嘅銀包返嚟，放哂啲903 id card、Big Echo會員卡呀落去，再放埋屋企人女朋友嘅相，最後放埋嗰一百幾十蚊入去。成個銀包就好似藝術品咁，就咁放喺度，都百看不厭。
 
但人總會成長，到若干年後，我開始知道，銀包並唔係用嚟睇嘅。
 
到我踏入社會，就知道「人靠金裝」呢個道理。好多人一眼望人就外表，跟住就係望你出手。試諗下，如果一大班工作朋友出到街，大家落老蘭飲杯嘢，酒過十幾廿巡到咁上下要埋單時，侍仔一隊張三千幾蚊嘅單嚟時，你先辛辛苦苦喺個銀包度抽幾張一百蚊出嚟，再面懵懵咁問：「除幾多份呀？」呢啲咁嘅行為係幾咁樣衰，幾咁唔夠成熟。
 
你又試諗吓，就算你一個月搵萬五蚊都好，埋單嗰時你一嘢拎四千蚊出嚟埋單，跟住好有型咁同班同事講：「得啦，慢慢計。」同第一個方法一來一回，我肯定同場嘅女同事一定會對你另眼相看。當然，型完之後點樣問同事逐個收返飲嘢嘅錢，應該都有少少頭痕。但男人嘅意義，不外係嗰三個字「型咗先」。
 
其實最後你要用嘅錢都係一樣咁多，但出嚟做事就係需要套路，後者方法絕對係現今社會所有男人選擇用嘅方法，所以點解好多男人都唔中意拎銀包，中意成堆錢放喺個後褲袋度，就算每個月得幾千蚊用，都要由月頭一號將呢幾千蚊一路袋到月尾用哂為止，都唔恨放喺銀包度慢慢用。
 
因為錢已經搵得唔多，仲唔扮吓有型，你真係想有女埋身都難。
 
薛可正Facebook Page
http://www.facebook.com/sithoching

Uncategorized 個回應 | 5,409 個已瀏覽 |