男人的Fantasy (一三三)《男人走多步 》
網上資料圖片
最近，同女朋友特別多交鬧。
佢係典型天蠍座，黑同白嘅三觀，無中間位嘅情緒。我係一個超級唔細心嘅金牛，長氣麻煩，佢最唔中意俾人煩，sorry，我最中意煩人。
相處一段時間，大家都開始放低戒備。知道對方死穴，駁火時只要唔好打到死穴就得，火力可以調較猛啲。
剛一齊時，就係佢對身邊人嘅推心置腹，令我覺得佢好好。好不容易走埋一齊之後，男人嘅老毛病就開始出現，我開始覺得佢對人太好，成日唔識照顧好自己。
唔識好好照顧自己，係指無論係唔係佢能力以內嘅事，佢都會應承咗朋友先。意見多，爭執自然多，頭先都講左，只要唔打中死穴嘅話，大家嘅火力其實不經不覺中老早就加大咗，以前會嘈一句嘅嘢，而家會嘈一個鐘；以前會鬧半日嘅嘢，而家會鬧夠兩日。
一切好似係正常嘅事，但諗深一層，係唔係個個都一樣，件事就等如正常。
係咪轉淡正常、係咪火力加大係正常、係咪慢慢凋謝都係正常。其實所有正常，都只係因為人正常都會擁有惰性。過咗熱戀期，轉入生活期，開始唔新鮮，自己唔願郁，就將啲嘢撥入「正常」行列。呢個做法常見，所以人人都以為正常，如果唔捍衛呢個正常，唔正常嘅嘢就好易變成錯同過失。
人正常有惰性，正常有私心，正常貪新，正常忘舊，正常貪玩，正常俾藉口去推翻自己，正常揀錯，正常番兜，正常痛苦，正常loop。
突然醒一醒，眼前得來千辛萬苦，記唔記得當初講過嘅說話？為咗穩定而一齊，最後唔好討厭穩定而分開。
穩定代表悶，但都代表不息。煙花爆一分鐘，金堆玉砌；燭光燃一輩子，平淡是福。
做男人永遠都要諗多步、講多句、諗多樣。唔好成日一鬧交就諗分開，不如諗下當初點解一齊啦。
薛可正Facebook Page
http://www.facebook.com/sithoching