網上資料圖片
 
我今年三十八歲，我係睇成龍電影大嘅，對於呢位近年聲譽好壞參半既巨星，我依然係ok崇拜佢嘅，我知道咁樣講會有一半朋友出嚟揶揄我，但我依然想講返自己心入面嘅說話。
 
成龍喺大眾眼中所犯既錯，不外係咸濕同亂講嘢。亂講嘢我係經常，但好似佢咁成日亂講一啲明知會俾人鬧都繼續講既嘢，我就好少可。至於咸濕，喺呢個無錢都要用app溝女約炮既世界，我真係唔敢喺道德高地上鬧人咸濕咁大膽，如果我有佢嘅身家，應該比佢咸濕幾倍。
 
我經常強調，每個人同我哋睇人都應該有層次，我哋唔可以單一咁相信「呢個人好衰，好咸濕」「呢個人好懶，唔好」
 
一個懶嘅人可以心地好，一個咸濕到處留情嘅人，可以係對兄弟推心置腹嘅男人。
 
睇到成家班四十年嘅報導，一個團隊，維持四十年，由一隊變六七隊，當中有唔少成材，有自己嘅成就。當然有人會講「你唔睇吓佢點對肥段同盧惠光」，呢類我接觸唔到當時人嘅新聞，我好難做一個判定，但同時又問問自己，平時同班同事嘅關係，係唔係都咁妥當？
 
四十年，對於我哋呢一代嘅男人，做一件事要做到四十年，真係諗吓都唔好。朋友識幾年已經唔知點走落去，有啲結咗婚生埋仔又自然流失；有啲搵到錢彈起咗，貧富問題又令大家愈走愈遠。有時唔係兩個人想分開，而係腳上嘅路偏離咗，要走遠自然就會發生。
 
我唔係幫成龍精神自瀆，要歌頌佢豐功偉績，而係我呢啲約場波踢都唔成功嘅人面前，做一件連續四十年嘅事，係令人非常羨慕嘅偉大成就嚟。
 
薛可正Facebook Page
http://www.facebook.com/sithoching

Uncategorized 個回應 | 7,742 個已瀏覽 |