男人的Fantasy (一三五)《安心病》
網上資料圖片
男人有時會自卑得無緣無故，就連佢自己都唔知點解會突然有情緒。
好多男人都唔擅長表達，跟住慢慢由唔擅長變唔主動；最後由唔主動變成缺乏呢種能力。
呢個係千古話題嚟，女人問男人點解唔講，但好少理解其實男人已經係唔識講。
「唔識講都要講。」好多女人會有呢個反應，我心諗妳都低能，知唔知咩叫「唔識」呀？
男人唔怕痛唔怕捱，偏偏最怕因爲自卑帶嚟嘅所有不安。痛同捱都係可以處理到嘅事，因為我哋都知道係死唔去。
但不安感，係可以摧毀一個人。
身在外地嘅女友今朝一個電話，令到我成朝都無哂心機做嘢。女友唔舒服咗一晚，女人嘅痛加埋智慧齒，將佢折磨到完全瞓唔到。
「好痛，食唔到嘢。」
「食粥。」
「嗯。」
我知佢好痛無心機，再講食粥瞓一陣飲暖水食藥未抖下啦都係毫無意義。因為佢就係好痛，好痛嘅情況下依舊要處理工作，好痛嘅情況下仍然要解決好多問題。
「嗯」
我覆返佢短短一隻字，就望住我同佢嘅對話，無再講任何嘢。我好努力咁諗我可以再做多啲咩，可以令到佢舒服啲，但放低電話，我眼前都係一大堆嘅工作。我唔可以即時出現喺佢身邊，再多嘅問候說話都係徒勞。
唔可以令佢身心俱疲時 ，安心放低工作去休息；唔可以令佢有問題要處理時，因為知道我忙而唔可以安心咁向我要求幫助。
呢啲用說話解決唔到嘅問題，我責無旁貸，亦都係突然覺得自卑嘅泉源。
男人年紀愈大，愈怕自己能力以外嘅事。因為時間唔夠嘅問題慢慢明顯，每日起身照鏡，頭髮愈嚟愈少、風濕愈嚟愈痛、瞓得愈嚟愈短都會提醒我哋，可以用嘅時間已經唔多，手上嘅箭慢慢少，個紅心亦愈嚟愈遠。
唔好再諗買咩大屋，環遊幾多個世界，要對身邊嘅佢用幾多物質上嘅好⋯
我想妳安安心心咁小病是福就好。
薛可正Facebook Page
http://www.facebook.com/sithoching