男人的Fantasy (一三六)《叫阿仔做朋友》
阿仔今年九歲，愈嚟愈有自己諗法。
呢個應該係所有父母都會驚但同時要接受嘅事，「有諗法」代表佢會有自己決定、代表佢會超出你管制嘅規範、代表佢會⋯逆你意。
喺「父母就係大哂」呢啲自堯舜開始就有嘅觀念當前，你個塞豆窿細細個成舊麵粉咁任人舞，仲要我餵你飲奶執你屙屎，到大個少少得幾歲人仔，就敢同老子say no？無可能！呢啲唔係教唔教導有方嘅問題先，係你老豆我塊面擺去邊嘅問題呀。
中國人世間，「面子」其實係ok緊要的。
基於呢個問題下，好多時小朋友心目中自己嘅「選擇」，就會變成父母心目中嘅「逃走」
逃犯係要拉嘅，亦都唔需要解釋咁多，呢個係管教一代嘅思想。
而自由係忠於自己既，我本來就有嘅嘢我使咩同你哋申請，呢個係新一代嘅諗法。
每個上一代都想以自己做榜樣，要下一代遵從、模仿、朝拜。
但So99y，我個仔好在有一個唔太叻嘅爸爸。我由細到大都無咩自信，書讀到中三因爲打交，喺訓導未踢我前已經自己申請走人先，後來知死讀夜校嘅唔計，但我本來就係一個讀唔成書既人。
讀書同修養係成正比，所以我呢條屋邨仔，大個咗之後知道禮貌係幾重要都好，我最多係識得「唔該前唔該後」就算，呢啲空泛有時又未必啱時宜嘅禮貌，有時都幾無謂。
打工嘅又唔算好，最企理著老西坐甲級寫字樓果幾年，都係做住啲呃呃氹氹嘅經紀工種，無自信又無高度。
加上我懶，對阿仔嘅付出，永遠都唔夠多，所以我知道自己裡外都唔係一個好爸爸。
既然唔好，就唔好擺無謂嘅高度。
阿仔九歲，好多時同佢傾偈都會同我有意見，但我望住佢就好似望到自己細個一樣。探索世界要勇氣，自主就係其中一樣產生勇氣嘅事。
佢問我嘅嘢，就算幾唔關佢事都好，我都會試吓答佢。佢問到一頭霧水時有佢一頭霧水嘅可愛；佢問到一啲佢覺得要時間消化嘅事，我亦要忍心俾佢知，世界上可以快樂嘅事其實唔多。
其實呢個係對自己一個鍛練，面向一啲可以令自己高高在上嘅人面前，試吓同佢平地相處，你自然會學到好多新道理。
最緊要，係個仔喺你身上體驗尊重，實踐尊重。
薛可正Facebook Page
http://www.facebook.com/sithoching