男人的Fantasy (一三七)《與神對話》
網上資料圖片
每個男人都會有女神，呢種稱呼雖然近年已經用到同接近街市阿叔見到師奶買菜時叫「靚女」一樣咁濫，但男人係好清楚，自己心目中嘅真女神係點嘅樣。
男人比人感覺都係咸濕，咁其實都唔係感覺，男人咸濕係正常，不過好多有閱歷嘅男人，咸得嚟都有層次啲。
女神係唔可以拎嚟咸濕，呢個唔可以叫定律都應該視為戒條。男人一生見太多女人，溫柔嘅、淫賤嘅、野蠻嘅、深愛嘅等等等等，數目之多，連男人自己都數唔清，但視為女神嘅女人，遇得上嘅或然率係最低，因為呢個女人要俾到男人一種感覺先可以叫女神：係可以用嚟敬仰嘅。
我哋可以接受女人嘅溫柔、可以配合女人嘅淫賤、可以無視女人嘅野蠻，亦可以假裝自己嘅深愛，但唯獨敬仰，呢份感覺係男人最難扮。
好簡單，好多男人整來就睇唔起女人，要佢哋喺無著數嘅情況下放低尊嚴去奉承一個女人，你發夢啦你。
但女神呢個物體，就係天生俾到一份可遇不可求嘅感覺你。放心放心，男人係唔會溝女神，因為前設中女神一出場已經係無敵，單單係果種只可遠觀嘅感覺已經令男人自願扯白旗，喂睇清楚啦，白旗呀有個白字呀唔好亂諗。
咁你可能問，女神有咩用？我哋男人去到一個年紀都可以話要乜有乜，溝到嘅都已經溝晒，溝唔到嘅都學識叫自己唔好諗，乜都有咁仲要女神做咩？
女神咪就係要俾「距離感」我哋，細個玩具店櫥窗入面隻鐵甲人又好、中一時隔離班果個校花又好、青春期時雜誌入面果架成二十萬嘅跑車亦好，統統同女神一樣，就係距離感。距離感可以產生失落感，基於呢世都唔會得到嘅感覺，你先會覺得呢個世界仲有嘢係等住你，你唔會起身屙完屎唔知有咩做，你有好明顯嘅目標，一個得唔到嘅目標，俾你每日都滿身幹勁咁生活。
所以「女神」不能隨意接近，一旦玩得太熟，你搵唔返果個佢同你講一句嘢都搞到你心跳超標既人，就閣下自理。
薛可正Facebook Page
http://www.facebook.com/sithoching