男人的Fantasy (一三八)《愛情玩具》
網上資料圖片
阿麒從小到大就係一個大話精，每日除咗早晨同晚安，講嘅說話幾乎無一句係可信。對家人講大話、對朋友講大話，對愛情，佢自然都唔例外。
年青時，佢嘅女朋友好似走馬燈咁，一個換一個。乜嘢係忠貞，乜嘢係承諾，阿麒從來都無研究。佢只係知道穿插喺一個又一個美女之間，一種虛榮同滿足感。
愛情係好玩，所以最好就係玩愛情。
正所謂上得山多終遇虎，當阿麒以為愛情不過係流於嘈交好返、互嬲幾日甚至係一個月就可以忘記對方嘅事時，二十七歲嗰年，佢遇上咗阿晴阿晴好愛阿麒，佢係一個好剛烈亦都好投入愛情嘅女仔，就喺阿麒同阿晴拍拖第七個月嘅時候，阿麒一如以往地有外遇。
阿麒純熟咁向阿晴提出分手，佢以為所有事都一如以往，easy come easy go .
分手第二日，阿晴自殺，搶救三個鐘頭後，轉到深切治療。
阿麒驚訝咁去醫院搵阿晴，但阿晴屋企人無俾佢入去見阿晴，最後阿麒離開，以後都無見過阿晴。
就係呢一次開始，阿麒嘅愛情世界停低咗。佢無去搵新嘅女人，佢只係每一日都諗，阿晴點解會自殺？愛情咁小嘅事，隨手就可以拈來，有必要用自己條命嚟換咩？
唔知係驚咗定係愛情淡季，往後三年阿麒都遇唔上合眼緣嘅女朋友。喺三十歲嗰年，阿麒再一次拍拖，佢認識咗阿菲。阿菲係一個好吸引嘅天蠍座，阿麒同佢一齊覺得好稱身，好開心。
慢慢，阿麒對阿菲愈來愈好，嗰一種無微不至係好熟悉，阿麒記得，呢一份關心，原來係當年阿晴對阿麒嘅感覺一樣。阿麒開始內疚，因為佢開始明白阿晴當年對自己嘅好。原來忠於自己忠於愛情咁愛一個人係咁嘅感覺，唔知係人到三十有轉變，還是阿晴對阿麒嘅改變，阿麒決定安定落嚟。
亦喺佢決定安定落嚟時，阿菲向阿麒提出分手。原因，同當年阿麒向阿晴提出嘅一模一樣，第三者。
阿麒望住阿菲個表情時，個心覺得好痛。眼淚開始滲出嚟，阿麒喊嘅原因，係因為佢眼入面除咗望到冷漠無比嘅阿菲之外，佢仲隱隱約約咁，見到阿晴當日嘅表情。
從此，阿麒再唔敢拍拖，就算有合眼緣嘅人，佢都唔敢再投放感情。可能，佢係驚再遇到好似阿菲呢一類咁水性楊花嘅女人；更唔好彩，可能會遇到當日嗰個視愛情如玩具嘅自己。
薛可正Facebook Page
http://www.facebook.com/sithoching