2017/07/28
男人的Fantasy (一三九)《身體健康》
網上資料圖片
表哥最近身體有少少毛病，我呢個做表弟嘅，平時好日都唔會搵表哥，聽到呢個消息就臨急抱佛腳去搵佢。
我同表哥年紀相差八年，但由細到大都幾好感情。佢睇住我大，我就睇住佢嘅創業之路。
表哥一世都係生意命，性格隨和，人生所有野心都係放喺生意上面。我細細個就跟佢去佢鞋舖玩，喺舖頭天台飲我人生頭幾啖嘅啤酒，聽佢講吓我當時聽唔明嘅生意苦水，兩老表嘻嘻哈哈又一晚。
然後做人嘻嘻哈哈又大半世。
表哥好似一個典型男人嘅路，生意場上馳騁大半世，為嘅係安穩生活，但偏偏最後忘記我哋能令生活安穩嘅原點。
好多男人不斷打拼，忘記生活需要啲咩，所有時間都放喺生意上面，無享受亦無伴侶。因為生意而驕傲；亦因爲生意而失落。
直到去醫院探表哥，佢嘅狀態話俾我知佢好攰，好多男人嘅攰都唔單單係一時三刻，講唔出嘅攰通常都會圍繞我哋一世人。
「休息吓，去吓旅行。」
「係啦，成世人都無咩去旅行。」
呢兩句對白，令我時間又返去一九九四年五月一個好熱嘅夏天，表哥帶住我喺佢鞋店嘅天店飲啤酒，表哥拍我個頭同我講：
「正，大個仔要去多啲旅行。」
「旅行有咩好去，表哥。」
「見識吓嘛，大個唔好剩係掛住做嘢，要識享受人生呀。」
返到現實，望住行緊去廁所嘅表哥背影，我感受到，男人一生，總有好多矛盾，有好多苦處同打擊，仲有好多與初衷相違嘅身不由己。
表哥，健康快樂就好。
薛可正Facebook Page
http://www.facebook.com/sithoching
COMMENT