男人的Fantasy (一三九)《起底組》
今個星期大事發生，男人嘢放埋一邊，點都宣傳吓自己嘅喜事先。
小弟首次執導嘅電影 起底組，執筆前一日舉行咗開鏡儀式，戲入面嘅演員鄧麗欣、陳凱琳、游學修、林耀聲仲有鄧月平都齊齊出席。今次有機會執導，要多謝監制伍健雄同編劇沈錫然，作為新仔嘅我真係好似一舊雲咁，多謝佢哋喺短短三個月入面，好似雞精補習班咁篤住我，話俾我知一個導演需要做嘅係乜。
呢幾個月學習期係好開心，每日有唔同嘅知識，亦有唔同嘅打擊。以前做編劇基本上係自己做自己事，寫好我要寫嘅劇本就唔使理人。但今次做導演係完全唔同，上至一個景下至一件衫，啲手足都會「導演、導演」咁追住開你。有時係幾爽皮，成個世界圍住你嘅感覺真係一世人冇幾多次，但慢慢都會累積到一定嘅壓力，因為作為一個決策者，是好是壞都會取決於你手上。
「起底組」，就好似好多不被欣賞嘅男人一樣。可能唔夠靚仔，亦可能唔夠有錢，喺呢個早已經被規限既世界當前，會被視為不夠水平嘅一類。
但正正係因為世界都盲目咁追逐住同一兩類既嘢，先將所有人去規劃化，非黑即白。
起底組呢套戲，就係想俾大家知，你地眼中嘅好，唔一定好；你地唔會欣賞嘅事，亦都唔代表一定差。
起底組呢套電影，講嘅就係起底組呢個文化演變中走出嚟嘅產物。多謝監制諗到我呢個高登仔，可以俾一個機會我，幫高登仔做一個正名。外面好多人覺得高登仔甚至係起底組都係一班唔識溝通嘅廢青，但其實呢班人個個卧虎藏龍，每個人都有自己專長。
其實每個人都有唔同專長，只係睇你識唔識運用，起底呢家嘢，有時都可以好幫到手嘅。如果要認真去研究起底呢種文化，真係寫一篇論文都寫唔晒，所以寫住電影先啦。
就咁講係講唔明的，老土少少講句，到時入戲院慢慢欣賞啦。
薛可正Facebook Page
http://www.facebook.com/sithoching