網上資料圖片
 
男人一生入面，總有幾樣嘢係要試吓。上一次東莞、去一次歐洲、買一隻勞力士，又或者係買一架車。
 
不過香港地養一架車嘅洗費，其實係永遠計唔到數嘅。好多「理智」嘅人，會同你計租個車位幾多錢、你架歐洲車一公里油錢又要幾多錢，仲有就係架車啲零件好難搵，所以維修費特別貴之類等等等等…
 
用經濟角度去睇「買車」呢件事，係永遠唔會感受到當中嘅浪漫。因為男人一世人有唔同嘅階段，只要你得到相應嘅道具，呢個階段就等如成功過關。
 
由一出世兩手搖搖，去到臨死前身邊兒孫滿堂。男人一生中有唔同嘅目標，由青春期坐巴士去溝一條女，帶佢去靚嘅地方食一餐貴嘅飯；再儲錢同女朋友去一轉亞洲旅行，係唔係好耳熟能詳？去到差唔多呢個階段，你自然就會諗住買一架車。
 
你會開始覺得坐巴士好熱，坐的士又好受氣。有自己車係洗費大好多，但係唔知點解，呢啲錢用得特別舒服。揸住架自己嘅車，載住個自己心愛嘅女朋友，同佢周圍去食唔同嘅美食，就算係一粒魚旦一條腸仔，個感覺都係美好。
 
男人有一架車，其實某程度上就係一種「自由」嘅象徵。可以有自己空間，唔單止自己可以自己伸展，仲可以帶埋自己想帶嘅人，到處咁走。呢一個，就係男人一生中最想要嘅藍圖開端。
 
所以，以後有朋友同你地講，想買一架車代步時，千萬唔好再用經濟角度去同佢地計數。大家都知道坐的士(仲要八五折)一定平過自己揸車，但其實佢要買嘅，唔係一個方便，唔係一個虛榮；而係一個方向，一個信念。
 
薛可正Facebook Page
http://www.facebook.com/sithoching

Uncategorized 個回應 | 11,625 個已瀏覽 |