網上資料圖片
 
年紀都已經一把，由十幾歲同第一個女朋友拍拖開始，愛情嘅奇妙同威力一早就已經見識過，但有時問自己，如果照咁講嘅話，人到咗一定嘅年紀係咪就可以喺愛情入面來去自如，答案又唔一定係絕對。
 
幾多歲嘅人都會迷失喺愛情入面，因為愛情世界入面好容易令人善忘，你試幻想吓，一個好大嘅環境入面有一百支電燈柱，支支都差唔多大細，我哋點可能記得佢哋之間嘅分別？
 
愛情基本上都係大同小異，唔明嘅可以去睇一次電影「十二夜」。十二夜，十二個程序，好似跳舞咁跳完就會還原基本步，但兩個主角呢個時候，已經因爲呢十二夜入面嘅磨擦，將對方踩到遍體鱗傷。
 
四圈打完未必一定再打，有人繼續有人離場。呢種形式嘅離合，根本就係千古不變嘅事實。你同A分手遇到B，同B走過十二夜後，仲諗緊再起唔起四圈時又遇到C，最後你頂唔住引誘，過場同C試吓開始第一夜。然後DEFGH一路落去，終有一日你見到A嘅時候，我肯定你應該連佢個名都唔記得，唔好話要記住你同佢支電燈柱係點嘅樣。
 
愛情拆開就係咁，同你喺淘寶買嗰啲山寨貨一樣，都係大批生產，仲係一模一樣，係咪好膚淺？
 
但話愛情膚淺咪啱，乜宜家人類好高尚咩？喺呢個充滿見異思遷同忘情棄義主導嘅世界入面，俾啲咁高質素嘅愛情你咃做咩？
 
點解無啦啦會打呢堆嘢？哦好簡單，最近有個朋友因爲男朋友斷正溝第個，仲戇居居咁自我製造好多幻想，諗到愛情係幾有彎轉同幾堅韌，但我睇個男嘅心衝咗出去就冇打算返，打咁大堆嘢只係想提醒好友，唔好美化同高估所有足以令妳致命嘅事，腳踏實地行返自己條路出嚟，同條友講我今篇題嗰六個字啦。
 
薛可正Facebook Page
http://www.facebook.com/sithoching

Uncategorized 個回應 | 4,602 個已瀏覽 |