網上資料圖片
 
愛情如果有一日失去，終點一定係用恨意結束。
 
經常聽到人講，「唔做情人都可以做朋友」，廢話，朋友一街都係，我做咩要搵個帶有感情包袱，唔係由零開始嘅人去做朋友？
 
所以每一段感情走到盡頭，或多或少都要用恨意去完結，至少一段時間係。
 
好多人問「使唔使呀？」「合則來不合則去」，講呢啲嘢嘅朋友真係首先要檢討下，自己點樣去對待感情先，所有嘅戀愛都係面向一生一世，劍指將來咁跑向婚姻。
 
如果抱住呢個諗法，即係幾乎將兩塊血肉準備溶埋一齊，去走將來嘅路，兩個人都溶埋咗，點樣合則來不合則去？
 
現代嘅人，都唔太需要感情。正確係指，都唔太需要擔心搵唔到新感情，因為現代人感情流量係實在好高，一個嚟一個去，合埋眼都遇到新嘅。
 
「將兩個人溶埋一齊」呢個諗法，其實慢慢被覺得不合時宜，慢慢覺得老土。
 
所以當每個人都輕鬆對待感情時，就會覺得「合則來」，就會認為唔需要有恨。
 
愛情慢慢變成即食麵，飽咗肚但無營養。
 
所以愛恨永遠都係並存，而且互相影響。唔好以為「不上心不傷身」，如果睇到愛情係咁淺白，咁你呢世連即食麵都唔好食。
 
薛可正Facebook Page
http://www.facebook.com/sithoching

Uncategorized 個回應 | 5,193 個已瀏覽 |