男人的Fantasy (一四八)《踐踏快樂》
網上資料圖片
人係有劣根性嘅，如果一個人唔面向自己嘅劣根性，時時刻刻都覺得自己身處道德高地，咁佢嘅自我感覺一定要非常良好，隨時隨地都要準備大量「偽善」同「強詞」喺身。
劣根性係咩？我研究咗咁多年，「貪婪」同「妒忌」係必備，一個人如果內心入面無呢兩個元素，喺我嘅準則入面唔算係一個完整嘅人。
既然每個人都平等地擁有劣根性，咁我哋其實要做嘅，唔係點樣隱藏，事事俾外界睇到面面俱圓一個完美嘅人；而係好好面對自己都有缺點，適當咁去將已有嘅劣根性消化，但唔好諗住消滅，前面已經講過，一個無妒忌心嘅人，就連人都唔算。
最近，做咗導演好有領會，換個身份，奉承說話當然聽好多，但呢啲說話從來帶唔到生活養份俾我，一個幾十年無搵嘅人，無啦啦走埋嚟唔清唔楚咁讚幾句，咁呢個人一係想攞錢，一係就想攞命，無第三樣。
不過咁樣我都可以接受，我最難接受係，會有一啲平時相敬如賓嘅朋友，無啦啦會因為我做導演呢件事變得講嘢有骨，總係覺得佢隱隱約約想伸個龜頭出嚟講兩句「睇你點死」嘅說話。
利申我唔覺得佢係「妒忌」導演呢個虛名，因為唔一定每一個人都想做，但可以肯定，有啲人會用佢嘅頭腦判斷你「唔值」，咁已經足夠驅使佢去做一啲令你感覺唔會好嘅舉動。
無錯，係一個十年唔見你一次，間唔中有事先搵你幫手嘅人，當你以為大家交往係處於萍水以上階段，萬萬唔會對你有任何攻擊時，「不值」呢個動機已經可以推翻一切，咁你諗吓呢份劣根性係幾咁濃厚，又幾咁原始呢？
呢種感覺係難受，特別當中係有啲你曾經幫過嘅人，不過放心，慢慢你會由問好多問題變到習慣；成個人漸漸由熱情變做冷漠，由以前見到朋友就想伸手幫，變到見到就死都唔想救，因為怕對方有一日身體健康時對你惡言惡語會加倍神傷。
呢種千古不變嘅人生定律，前人用四個字嚟稍稍整合，令到呢種本身極不愉快嘅事，變到好似洗面刷牙食飯屙屎咁尋常，咁唔需要感覺。
「係咁架啦」
薛可正Facebook Page
http://www.facebook.com/sithoching