網上資料圖片
 
港女係有一套特别嘅溝通方法，好多時兜口兜面佢都唔會將佢嘅諗法話俾你聽，但係佢又會隔住個電腦吓吓用千字文去掃你嘅罪行。其實男人係好鍾意女人同佢溝通，但係方法就要用得啱，如果唔係呢啲唔係溝通，係導火線。
 
有一種女人，係好鍾意將自己生活上所有嘅事都放上Facebook同人分享。上至瞓唔着覺，下至同男朋友鬧交。表面上，呢啲係心聲分享，但實際上，呢啲係批判，係圍攻，係糾黨嘅壞習慣。
 
港女嘅世界實在太冇信心，佢哋經常需要旁人大量嘅說話支持。如果唔係咁，港女好多做法都係講唔通嘅。阿珍尋日同男朋友鬧交，轉頭喺Facebook匿名講咗一段冇主旨嘅千字文，內容含辛茹苦，痛心非常。唔使一陣間，仲有一班港女姊妹，狗公朋友爭相安慰。
 
到最後根本無人知阿珍同佢男朋友為咩事嘈交，但佢男朋友背脊已經插左1000支箭。冇男人會鍾意呢種溝通，兩個人嘈交本來就係小事，但喺而家呢個世代，太多人鍾意管閑事，亦太多人鍾意拎自己嘅閑事去俾人管，以為呢啲就係最好嘅交心方法。
 
港女們係意識唔到呢一種危機，佢哋以為講吓之嘛係自己最好嘅解釋方法。但愛情其實係講感覺，並唔係講砌詞。
 
你可以有港女外表，港女購買慾，港女思想，但千祈唔好有港女式嘅解決方法，遲早出事。
 

 
薛可正Facebook Page
http://www.facebook.com/sithoching

Uncategorized 個回應 | 5,785 個已瀏覽 |