網上資料圖片
 
如果單純睇IG、FACEBOOK之類嘅社交平台，你會感嘆點解現代愛情故事愈嚟愈少，我打開嗰啲朋友嘅FB睇，十個有九個日日都係自己同自己影相，無拖拍不知幾枯燥。
 
特別係女人，食飯行街睇戲甜品行山旅行等等行為，唔係自己一個人去，就係同好姊妹去，好少可會見到有男仔相伴。阿珍係咁、阿欣都係咁，連阿穎都係…..咦咪住先咪住先，阿穎呢一堆去台灣影嘅相，明明係同佢男朋友去，點解成個相簿都唔見佢男朋友嘅樣？
 
佢行街係自拍，食飯都係自拍，食「瞞著爹」呢餐飯時仲放過同男朋友合照上我哋老死個群組，點解去到IG又變成獨照，下面仲要加多句「是一個人的節奏嗎？」
 
唔係喎，我諗吓諗吓，好似有個有錢仔溝緊佢喎，咁都啱嘅，佢條仔阿強都衰過偷食幾次，阿穎唔放佢出嚟都係好事，無謂為呢啲人去封自己後門。
 
封後門，如果阿穎係封後門，我喺度諗，咁其他女人係咪都係一樣封後門？佢哋都一樣有個好似阿強咁嘅賤人男友，定係佢哋覺得自己好多選擇？又或者咁講，佢哋係擁有好多選擇，定係希望等到自己有好多選擇？
 
有時都不禁講句，喺科技面前，我哋都好似有好多錯覺，我哋窮一生去搵一個真愛，但最後又花一世去擺脫呢一種沉悶嘅永恆。我哋追求之後又推翻，跌碎之後又勉強砌返埋一齊。兜兜轉轉，最後花光嘅就只有自己嘅時間。
 
睇完阿穎個IG，我手痕又去阿強個IG搵返同一張相睇。同一個日子，同一個地方，一個啱啱同阿穎張相對應位置嘅角度，有阿強呢一張自拍。
 
「瞞著爹太秘密，一個人就好了。」
 
痛苦的愛情。
 
薛可正Facebook Page
http://www.facebook.com/sithoching

Uncategorized 個回應 | 6,305 個已瀏覽 |