2017/12/08

男人的Fantasy (一五七) 《我女友係高漸離》

2017_12_07_薛可正MenCLub
 
網上資料圖片
 
無玩過又或者無興趣玩「王者榮耀」嘅朋友,呢篇文可能會令你睇得辛苦少少。
 
我同女朋友都好鍾意玩「王者榮耀」,帶返少少頭盔,呢篇嘢唔係植入廣告,只係我為咗歌頌女朋友喺遊戲入面拎到一次「五殺」,而為佢寫嘅一篇專欄。
 
我哋兩個都好鍾意用打機嚟溝通,無他嘅,因為隔住兩部電話,就算有咩唔啱大家都唔洗即時開火先嘛。佢真人性格比較易燃,爆炸力大但持久力較短,講得白少少即係易發脾氣但又容易無事,聽落好似好簡單,但有時爆嗰一吓分分鐘死幾件都無人知。我性格都係衰,但比較少因為小事會發好大脾氣,但一發脾氣就比較難熄火,聽落兩個人都好似好火爆,但呢啲其實都係一般情侶窮一生去研究嘅課題嚟。
 
所以講返開頭,一齊打「王者榮耀」係我哋最好嘅溝通方法,兩個人一齊衝鋒陷陣,得閒妳救吓我,轉頭我又幫妳頂兩招,好多時真係交都鬧少好多。
 
好喇,入門教學嚟喇,我喺遊戲入面係玩坦克呢個職業多,坦克係一個皮厚肉韌嘅角色,多數係負責衝前俾敵人打嚟保護自己友。因為性格使然,我玩坦克喺衝前俾人打嗰方面係幾擅長,但好多時衝過龍,都會令自己陷入萬劫不復嘅地步。
 
而女朋友係做法師,法師特性係少血易死,少血就自然企得遠,企得遠就自然睇得通。好多時佢用法師時,嗰一份冷靜都同佢本身性格完全唔同。我就係一打人就眼火爆,好似鬥牛梗咁追住人咬住唔放,呢個時候佢多數會發兩個訊息俾我叫我…「技能不全,撤退!」
 
又或者有時喺我俾人打到飛起時,佢好貼心咁發出另一個訊號:「正在前往支援」嚟俾我知道佢嘅存在,同對我嘅支持。
 
前晚我又一次喺一場五打五嘅比賽入面身陷險境,女朋友拎住一隻叫「高漸離」嘅法師,喺一句「等等我,馬上到」嘅大叫之下,一衝埋嚟就連殺五個敵人,一場五打五嘅比賽入面,佢一個人就可以殺五個人,睇到我都大叫咗出嚟。
 
就喺嗰一秒,我嘅魯莽相比佢嘅冷靜,我平時嘅鬼殺咁嘈對比佢嘅冷暴力,就好似一凹一凸咁互相配合。正所謂我唔柒又點顯得妳型呢?兩個人走埋一齊,就係要用盡所有方法令大家配合,生活如是、工作如是,呢個方法唔得,就試吓用其他方法溝通。
 
喺現實生活我同佢都係兩個坦克,但喺遊戲呢個空間入面,我就搵到佢可愛冷靜嘅一面。如果覺得自己同另一半感情唔好嘅朋友唔使灰心,行多兩行,試多兩試,你哋都會搵到你哋嘅「高漸離」。
 
薛可正Facebook Page
http://www.facebook.com/sithoching

COMMENT