2017/12/15

男人的Fantasy (一五七)《有一種感情,叫天堂M》

2017_12_15_薛可正MenClub
 
網上資料圖片
 
有一種感情,叫「天堂」
 
講明先,呢個唔係一個廣告,無收錢。
 
十二月十一號,對大眾嚟講係一個無咩特別嘅日子;但對我班老死嚟講,就別具意義。
 
一隻叫「天堂M」嘅手機遊戲正式開server,聽講最厲害時有廿一萬人同時上線。
 
一百萬人登記,廿一萬人上線,唔係因為呢隻遊戲有幾好玩。而係遊戲入面,帶住我哋嘅回憶。
 
遊戲前身,其實就係一隻喺2000年推出,以梁詠琪笑淫淫咁對住你講「做你平時唔敢做嘅嘢」嘅online game天堂。當年瘋魔台灣,傳到入香港後一樣大受歡迎,去親網吧都會有一班人喺度邊打邊大叫。
 
我同一班老死,就係咁樣認識。朋友介紹朋友、打交後惺惺相惜、企村吹水認識,最後大家現實世界一齊見面,踢波嘅踢波,拍拖嘅拍拖;到後來生仔嘅生仔、分手嘅分手。
 
我哋喺呢隻遊戲入面儲存咗最寶貴嘅年華,喺好多年後,有時上網睇到多年前天堂嘅畫面,獨有嘅配樂,我都好感慨時間過得好快。
 
其實好多朋友已經唔多見,每個人都有唔同成長階段,一年人事都可以面目全非,何況係十幾年?
 
我同邊個嘈過交、邊個同邊個分手時傷盡大家,講到明老死不往來、邊個同邊個十年無見,如同陌路,好多唔罕見嘅友情故事一直發生,我有時會諗,俾你再去返呢個地方,又可以搵得返啲咩?
 
我有懷疑過,遊戲再開時,會唔會無人有興趣去玩呢隻2D遊戲,畢竟電影都出到5D識噴水,2D遊戲有幾多人有興趣?
 
十二月十一號,開server前幾個鐘,我被拉入一個群組。群組入面,大部份以前一齊玩嘅朋友都喺度,大家都好期待再去返呢個盤古初開嘅老地方時,會再遇到咩事物。
 
最後,雖然我一如以往地玩兩日就覺得悶,但我都會繼續嚟到呢個地方,去保留好多,十幾年嚟一直無消失嘅回憶。
 
薛可正Facebook Page
http://www.facebook.com/sithoching

COMMENT