男人的Fantasy (一五九)《一人一個Winning Save》
網上資料圖片
今時今日FIFA崛起，個個玩足球遊戲嘅人都會每年期待；但喺long long time ago，曾經係我哋最愛嘅，係winning eleven 呢個經典足球遊戲。
我細細個時由實況足球玩起，嗰時無國家地方聯賽呢個玩法，嚟嚟去去都只有國家隊大亂鬥，直到winning有master league 呢個模式，真正嘅無日無天瘋狂打機正式開始。
當年同時間仲有CM呢隻足球經理人遊戲，「買賣球員」係一種非常好玩嘅事，用模擬嘅錢買自己心愛嘅球員，再砌成一隊自己愛隊，係幾咁美好嘅事。
但當時CM只係隻用文字bar做比賽系統嘅遊戲，無得親身用自己買返嚟嘅人，點都顯得唔太過癮。所以當winning出master時，大家都痴晒線咁日打夜打，務求盡快砌一隊自己嘅球隊。
「嘩，我尋晚買咗戴維斯，喺中場勁好掃。」
「我買咗卡路士，放咗前面同艾蒙度打雙箭頭。」
「勁唔勁？」
「射到龍都爆，點會唔勁？」
「想買龍門，有咩好？」
「柏魯加囉，超勁。」
「咁老⋯不如買保方試試⋯」
呢個就係十幾歲嘅我，每個星期都落球場同朋友踢波嘅話題。全世界都知一開波因為唔夠錢，我哋一定要買巴班基達或者艾摩卡治，但我哋都總有幾個自己嘅心頭好，就算幾屎，都要保留住喺隊波入面。
我以前必買哥利摩亞，就算唔夠踢我都會照出，因為無咗佢，就唔算係屬於我嘅球隊。
我試過成個save唔見咗，會立刻無哂心機打。成個人好似失戀咁茶飯不思，一路諗點解自己咁唔小心會失去咗佢。好不容易再振作，再拎返隊原廠設定嘅「日文仔」再打江山，再睇返得咗小錢，只可以再吸一大啖氣，同自己講：
「買返個巴班基達先慢慢儲錢啦⋯⋯」
薛可正Facebook Page
http://www.facebook.com/sithoching