男人的Fantasy (一六十)《再見古天奴》
網上資料圖片
今個星期講講足球，實在不吐不快。
我愛隊利物浦最近將古天奴賣咗俾巴塞隆拿，造價過億成交，呢個價錢，雖然未到尼馬加盟巴黎聖日耳門時咁恐怖，但我自己係表示收貨。
足球世界其實就係有少少似男女嘅愛情世界，無論係男方睇中女方，定係女方計劃以身相許，要發展一段長遠關係，點都要有大家都滿意嘅條件先。
不論男嘅貪圖女嘅好波，定女方鍾意男方有錢，條件傾好，雙方一旦結合關係，蜜月期之下，大家嘅諾言都會愈來愈甜，有時真係乜都講得出：
「加盟XXX係我少年時夢想」
「除咗XXX，我根本無諗過去其他球會」
係咪好眼熟？自己係咪都好似講過類似嘅嘢？
「我愛妳，一生一世」
「我第一眼就鍾意你」
又或者係⋯
「我好想同公司共同進退」
「公司好我就好」
蜜月期咩都講得出，呢個是她也是你和我嘅狀態，每個人都會做過講過，但每個人都會捉住呢啲事嚟做武器，講到底，就係劣根性。
有人話古天奴去巴塞係衰仔，續咗約又走，咁當初就唔好續約啦。
我就話如果佢唔續約先係衰仔，有冇見到我哋同市嘅巴克利係用咩方法去車路士？山齊士又幾多錢去曼聯？
如果佢上年唔簽約，個主動權唔會喺利物浦手上，呢次蜜會個價錢打半價都仲唔止。
又有人話，要走就一早走，季中先走點增強人腳？
到底佢係留多半季定早走半季？我個人係覺得留多半季，季初巴塞已經對古天奴無限接近，我相信古天奴有諗過留低，但巴塞吸引嘅程度，大概就好似當日利物浦對身在國際米蘭嘅古天奴同樣嘅吸引程度吧。
人來人往，就係人生。
「咁季中走呢？自私狗！」
大佬，你買人哋修咸頓個雲迪克都係季中走，雲迪克又係唔係一隻自私狗？
足球世界，愛情世界，都只係一個現實嘅世界。
今日他，明日你。
薛可正Facebook Page
http://www.facebook.com/sithoching