2018/01/19

男人的Fantasy (一六一)《新年審問大會》

2018_01_19_薛可正MenClub
 
網上資料圖片
 
大家都知道,由你哋青春期發育開始,每次一到新年,就係一年一度嘅「審問暨比較大會」。你哋一班表兄弟姊妹,由大至細,由男到女咁俾你哋嘅姨媽姑姐圍住……
 
跟住……
 
「阿強你讀書讀成點呀?你個表弟上年先考得個全級第二,嬲到你姑姐我呢,專心少少就考到個第一啦。」
 
「阿邦你畢業喇?搵工未呀?我叫表哥幫你問問佢公司啦好嘛,你表哥年尾先升完職,而家人工先得嗰五萬零蚊都係叫僅僅好,你哋班啱啱畢業嘅都真係唔知點算呀唉。」
 
「芬女妳男朋友呢?嫁未呀,妳表妹都做咗人阿媽喇。」
 
「志明你個仔做乜唔叫我,叫姑婆啦叫姑婆啦,做乜成歲仔都唔講嘢咁怕醜?」
 
我哋一班表兄弟姊妹,細細個已經好期待新年團拜,因為我哋可以由朝玩到晚,一路睇電視,一路拆利是。大家圍住喺房入面,拎住嗰幾張喺我哋心目中好似棉被咁大嘅五十蚊紙,再偷偷地落街買嘢食,買玩具,入機舖打機,一班人玩到夜晚先肯返大本營。
 
就好似好多潮文所講,隨住我哋愈嚟愈大個,手上面棉被咁大嘅錢慢慢變返細張,入機舖打機唔再係我哋最鍾意玩嘅嘢,我哋表兄弟們各有各嘅朋友,最後加上姨媽姑姐嘅審問,我哋開始變得愈來愈遲出現喺團拜嘅節日,有時,某幾個表哥仲會因為工作忙,而缺席呢個家族一年一度嘅日子。
 
就係當中呢幾年,甚至連你都缺席呢個你曾經覺得係盛事嘅大日子,你懷念呢個感覺,但又會有千百個原因繼續遺落。直到有一日,或者係你突然想通,又或者係你做咗人結咗婚,做爸爸…你會無緣無故地重新去搵返呢啲曾經嘅大日子。
 
你帶住自己嘅老婆同阿仔,再見返一班好似好耐無見嘅親戚,你會發現三表哥原來已經做咗爸爸,阿表姐個女都小學三年班,下個月仲要考鋼琴三級。姨婆同姑媽早兩年都已經過咗身,屋企嘅長輩已經無年年咁打麻雀,你偶爾喺一啲畫面入面,見到姑姐已經半頭白髮,諗一諗原來佢都已經係六十幾歲…
 
細個我一直唔明白,點解佢哋咁鍾意問三問四,問埋啲我唔識答嘅嘢。呢個時候,表哥個仔行埋我身邊…
 
「表叔。」
 
「嗯,你…叫咩名呀?表叔唔記得咗。」
 
「我叫陳大文!」
 
「哦,文仔…你…今年幾多歲呀?」
 
「五歲。」
 
「五歲…嗯……咁你讀幾多年級呀?」
 
「高班,天主教紅花會梁鎮英紀念幼稚園高b班。」
 
「咁叻仔呀讀呢間呀…咁…學校老師好唔好呀?」
 
「好,miss chan最錫我,miss wong就有啲啲惡,miss tong長頭髮…………」
 
我吃力咁同陳大文傾咗十分鐘,終於明白,咁多年嚟姨媽姑姐嘅審問,係因為我哋根本都唔熟悉大家………
 
薛可正Facebook Page
http://www.facebook.com/sithoching

COMMENT