男人的Fantasy (一六二)女人，本人有嘢同妳講
網上資料圖片
真正嘅愛情係乜嘢？妳哋細細嗰時，以為真正嘅愛情係個男人會同妳一生一世，事事以妳為先，從來都唔會鬧妳，永遠都將妳放喺第一位，係咪？
發夢啦，呢幾樣連妳自己都做唔到，經過咁多年、咁多位歷任嘅男朋友同妳互相折磨之後，乜妳都仲唔知道，一段最好嘅關係到底係乜嘢？
妳見唔見呀？Daisy個男朋友阿強呀，晚晚都同朋友出去玩到三更半夜，電話唔聽呢啲就基本，有時仲搵唔到人一兩日，係一兩日呀大佬。Daisy晚晚喊天光，佢一早就已經知道童話係唔實際，佢只係想自己可以好輕易都搵到阿強，搵返女人最需要嘅安全感就得喇。
仲有呀，阿珊咪拍咗拖兩個幾月嘅？佢嗰個喺鴨寮街做拍賣嗰個男朋友阿良呀，開始現形喇，啱啱拍拖時乜都唔出聲，阿珊就算點鬧佢，佢都係微微咀笑咁照單全收。就兩個幾月之嘛，愈嚟愈鍾意駁咀，佢呢啲摩打口阿珊點頂得住？慢慢搞到阿珊日日都唔開心，就算佢男朋友有問題，宜家都唔敢再出聲喇。
唉，小美又夠慘啦，宜家晚晚都要返兼職，佢條女阿明本身已經大洗，之前仲學人賭馬賭波賭期指，最後搞到一身債。做份裝修搵得兩萬幾蚊，但條街數就成三十萬咁多，小美唔幫佢，佢真係跳樓都似。好在佢都幾聽小美話，宜家一出糧就俾晒份糧小美去還錢，小美都叫為佢捱得心甘命抵。
係咪對愛情無晒期望，覺得唔係心目中所想咁呀？係呀，就好似妳哋個個女人第一次見啲男仔都化妝，男仔咪以為呢個就係妳哋嘅真面目，妳哋化到咁靚，有冇諗過落咗妝之後對呢班男仔個世界衝擊有幾大呀？
不過唔使怕，世界永遠都有曙光，只要妳相信。
係咪唔想好似Daisy咁晚晚都搵唔到個男朋友，想佢成日陪住喺妳身邊呀？
係咪當妳M到搵人鬧時，個男朋友一句唔駁你咀，安安靜靜咁坐喺度唔郁俾你鬧呀？
係咪想同男朋友有個美好將來，佢都唔會亂洗錢，唔會亂咁買嘢呀？
聽我講，俾佢地玩Mon Hunt啦。
只要妳哋俾佢玩，佢哋就會日日唔出街，妳哋想幾時搵到佢哋都可以搵到；佢哋會坐喺電視前面無表情，就算點鬧佢，佢都唔會有時間俾反應妳哋。
最緊要一樣就係，佢哋唔出街就唔用錢，咁起碼妳哋唔使好似小美咁晚晚出去做兼職丫。
做咩呀？好委屈呀？要妳俾佢哋打機好侮辱妳哋女性主權？Mon Hunt無得罪妳哋架，唔好見到成班男人好開心咁一齊打，就要驚死人唔知妳權威咁無啦啦唔俾人玩，係要折磨個男朋友三幾日先舒服。
妳唔俾佢玩機，佢咪出去玩女人囉，自己諗。
薛可正Facebook Page
http://www.facebook.com/sithoching