網上資料圖片
 
周杰倫最近推出新歌，作為老歌迷嘅我，當然第一時間上youtube聽。
 
其實呢首「等妳下課」嘅曲風聽起上嚟有啲悶，唔商業嘅歌就係有呢種弱點，一路聽個人就一路放空，然後慢慢諗起，原來周杰倫都快四十歲，陪咗我哋都有十八年。
 
喺呢個人來人往，走馬看花嘅年代，可以留喺身邊十八年嘅事已經所剩無幾。
 
有人話「等妳下課」呢首歌特別悶，我唔否認。但以周杰倫多年才華，我唔覺得佢唔可以做一首搶耳商業嘅歌出嚟。
 
仲記唔記得聽「回到過去」呢首歌時邊個坐你隔離？你哋係分開？分開之後有冇見過，你喺邊度寫過「至少不再讓你離我而去」呢首歌詞比佢知？希望佢可以睇到？
 
過幾年之後嘅「以父之名」「夜曲」？呢段時間你開始咗自己事業未？有冇邊首歌係陪住你日日搏殺，部MP3入面日日都會播幾十次？
 
就算喺我哋結婚嗰時，有冇收過舊愛俾你嘅訊息？
 
「暗號」？「彩虹」定係「擱淺」？
 
周杰倫嘅歌就好似一把把有意思嘅刀咁，隨手檢起一把都可以貫穿大家嘅心。
 
到有一日，就可能係今日，呢個例不虛發嘅浪子都覺得係時候同大家講再見，完成咗人生大事嘅佢，宜家都開始踏入另一個階段，佢無能力再好似以前咁陪住我哋渡過人生入面一個又一個難關。然後佢會選擇一個最平淡嘅方法，從歌曲、從人生，由絢爛轉成平淡，由高峰跑到身後，最後慢慢淡出我哋嘅世界同埋回憶，為所有事劃上一個句號。
 
「等妳下課」，就好似我哋走完某一個階段嘅課。
 
薛可正Facebook Page
http://www.facebook.com/sithoching

Uncategorized 個回應 | 5,222 個已瀏覽 |