男人的Fantasy (一六四)以言之罪
網上資料圖片
謝安琪因為WhatsApp Group內一段有關對疫苗見解錄音流出，最後搞到專家走出嚟，政府又開記招回應，一石激起幾百個浪，原因到底係件事本質太過嚴重，定係香港風氣太過恐怖？
謝安琪係公眾人物，所以所有公眾場合佢都需要慎言，呢一樣係唔需要懷疑，定律嚟。但當各位覺得自己要有收工時間，放工時間唔想睇老闆Msg時，公眾人物都應該有呢個空間。我幾佩服將呢段錄音流出嘅朋友，個腦可以零運作得咁緊要，完全無考慮任何原因就將段片流出，無錯最近嘅流感係好厲害，但香港有一種更厲害嘅嘢叫花生。
香港人只要有花生有嘢玩就無問題，邊樣啱邊樣錯一向都放到好後。而且仲會企到喺道德高地頂峰，無他嘅咪就係要俯瞰吓你哋班世人有冇出錯囉。
每一個人，如果智力正常嘅話，對世界上每一樣嘢都會有認知。分別係在於你希望對呢樣事物嘅認知有幾多，呢一樣係完全受到切身程度而影響。毒男對AV有認知，球痴對英超西甲歐聯有認知，巴膠日日就企喺巴士站，增加自己對巴士嘅認知。
一位媽咪將心機放喺兩位小朋友身上，所以佢對病症又或者係疫苗嘅投放時間相對地多係好正常，有認知就自然有立場，有立場就自然有見解，非常合理。
我喺網上聽過唔好飲咁多奶，因為奶係會養癌細胞，我有同身邊朋友去講呢個問題，簡單如：「喂，飲得太多奶好似易生癌喎。」
我朋友會答我：「我最怕窮，同無奶飲，死我唔係好怕。」
呢一種私底下朋友式嘅討論，我夠膽講會出現喺任何長短深淺嘅友情之上。如果你無，唔係你無討論，只係你無朋友。其實係尋常事一件，只係睇吓香港部份人點樣去判斷呢件事。
如果覺得對錯唔重要，如果覺得藝人必須當如聖人，你就自然明白香港點解會有咁多呢啲事出現。
當年賣翻版俾人捉嘅網民變身大英雄，反而私人床照被偷嘅藝人被鬧同笑足十年，大約都可以睇到香港到底存在住一個乜嘢嘅世界。辯黑白只係一張糖衣，更多係內裡有幾多娛樂性，同埋陰暗面可以有幾多。
謝安琪拎住自己嘅見解同朋友分享，最後一班人出嚟聲討，再拎住一堆專家同政府人員嘅說話做武器，最後滿城風雨，求生花者滿足到不得了。
容許呢一種以言入罪，大家以後只可以對住度牆，一邊飲住鉛水，一邊自言自語。
薛可正Facebook Page
http://www.facebook.com/sithoching