男人的Fantasy (一六五)最快樂的旅行
網上資料圖片
一九九一年，長洲。
我一世都會記得呢個充滿人生探秘嘅旅行。
好多人話，最開心嘅旅行係去呢個國家滑雪，或者係嗰個國家潛水，我就覺得，呢啲都唔係好嘅選擇。
人生不外係渴求同尋覓，俾你做到最有錢嘅人，過十年有錢生活你都係會厭倦；但同時窮嘅人永遠都係想追逐金錢，亦即話，我哋嘅人生最需要嘅，係無嗰樣就想要嗰樣。
試問一個只要我哋俾錢就可以得到所有感覺嘅旅行，又算得係啲咩呢？
你哋可以問我，一九九一年你去長洲有咩咁巴閉，喺我未答你哋之前，你可唔可以幫我諗一諗，你哋小學至中學，情荳初開時，見到自己心儀嘅對象，對佢嗰份好奇心同神秘感覺，係幾咁吸引，又幾咁強大？
我六年班就好鍾意陳小梅，唔使諗喇我梗係用假名啦，廿幾年後俾佢知道我當年暗戀佢我咪好瘀？想當年，六年班嘅男仔望六年班嘅女仔，係特別有衝擊。嗰一份我知道佢有變化，但我從來唔知佢會點變化嘅感覺係好神奇，啲女仔唔見兩個星期有時就成熟咗好多，又或者係過完一個長假期，佢會有唔同打扮。
嗰陣時，我次次跟阿媽返大陸，喺鄉下村屋二樓個露台，成日都會發白日夢，如果可以同陳小梅返鄉下一齊玩就好喇。玩乜嘢我無諗，覺得如果兩個人可以走嚟走去，佢可以俾我見一見佢唔係返學個樣我就覺得好開心。
無錯，就係佢唔係返學個樣，我哋由細到大第一個鍾意嘅女仔，如無意外我哋會日日見住佢著校服嘅樣，即係嗰一種預料之內嘅事，雖然都係靚，但一定唔會夠我第一次見到佢著屋企瞓覺衫個樣咁震撼。
一九九一年喺長洲，我終於都有機會喇。
嗰一年係小學六年班嘅教育營，男仔女仔俾幾個老師帶住，去一間社區中心咁嘅地方瞓兩晚，玩吓小遊戲，周圍行吓餵吓蚊。
我就係喺呢度，第一次見到陳小梅著佢喺屋企時嘅衫，我親眼目睹嘅一刻，直情有同佢同居嘅感覺。所有嘅事都係神奇，我同佢有好多次嘅眼神交流，最後喺夜晚，我仲同一班同學決定做一件轟轟烈烈嘅事，就係偷偷地去女仔宿舍嗰邊。
我哋成班慢慢咁行去，愈行就愈黑，愈就愈驚，到最後大家都唔知去咗邊，正打算行返轉頭時，突然間有人叫我：
「喂，薛可正。」
我回頭，係陳小梅著住一套睡衣，唔使諗喇六年班呀話咗，唔係喱士，係美少女戰士呀。佢同另一個同學企喺轉角位望住我地，問：
「你哋去邊呀？」
「無呀，周圍行之嘛，妳哋呢？」
「去廁所囉，拜拜。」
世紀對話，我人生一直視呢段短短嘅三言兩語為世紀對話，你知道嘛，就係我人生中追尋，但又完全預料唔到嘅感覺呀。我開心到完全唔識形容，你哋可能會話「挑你乜都無，開心乜？」我就係想講，正正係乜春都無，我都開心成咁，人生有幾多個時刻我哋係兩手空空但感覺到無比快樂？無架喇，做人做幾廿年，個個唔係負能量就係貪心，日日唔係想逼死人就係想逼死自己，無咗呢種唔開心好耐架喇。
所以你哋宜家明，我所講嘅最開心嘅旅行係咩啦？點呀，宜家個腦諗緊啲咩？係咪好多年前嘅一個已經好耐無搵嘅人？
薛可正Facebook Page
http://www.facebook.com/sithoching