男人的Fantasy (一六六)一個人
網上資料圖片
最近鍾意一個人，唔係鍾意咗一個人嗰種一個人，係鍾意我自己一個人。
自從離婚後，重新搵咗一個地方居住，閒時喺屋企寫吓劇本，打吓傳說對決，開頭一日三餐都公仔面，但每日都食，幾方便都會覺得頂唔順，所以我開始研究煮飯，慢慢再變成研究生活。
結婚十年期間，的確喺生活上面我可以免卻好多時間，但咁樣反而令自己走入前妻嘅生活入面。佢想要嘅飲食、佢想要嘅環境、甚至係佢想要嘅氛圍。
唔好諗埋一邊，我無對呢件事有任何不滿，所有嘅事都需要有一個主導，大方向決定團體嘅前路同結果，呢個係定律嚟嘅。
所以自己一個人生活之後，我開始慢慢搵返一種好耐都無試過嘅生活，我成為爸爸前嘅一個人生活。
我起身唔需要諗其他人出門時間，我瞓覺唔使諗張被會唔會搶得太多；食飯時我可以隨便走入一間只係望咗兩秒餐牌嘅餐廳，唔好味我可以起身俾錢就走。我仲試過一個人去睇戲，喺一個好想睇戲嘅時間，我遇上一套我好想睇嘅戲，但可惜得返最前一行。我唔使說服任何人就買咗一張飛入場，睇完之後我覺得條頸好似扭親，好彩我唔需要向任何人解釋。
凌晨三點我仲可以同新識嘅女性朋友WhatsApp，再打機直落到天光，食埋個老麥先瞓覺。臨瞓前仲可以約埋個女性朋友第二日晚飯，最重要係瞓前我唔使收埋個電話同Del訊息。
一切都係好正常嘅生活，但以前總會有人喺身邊質疑你，又或者係左右你想做嘅事。但呢個都係好正常，我哋自己都係一樣咁樣左右其他人。
我想講就係，原來一個人離開一段關係，佢係會好Enjoy佢搵到呢段關係之前嘅狀態，即係我單身，我去搵一個人嚟破壞自己嘅單身狀態，再過一段時間之後我又單身，又覺得單身嘅感覺真係好。
無就想有，有就想簡單，一複雜就想走。現代人對愛情嘅劣根性，真係直情話俾你知點解宜家嘅離婚率咁高。
不過點都好，喺再一次俾人管之前，我都仲係好Enjoy自己一個人嘅生活。自由，從來都唔係咁簡單。
薛可正Facebook Page
http://www.facebook.com/sithoching