男人的Fantasy (一六七)有機快樂
網上資料圖片
大家係唔係仲停留喺「人生點樣先快樂？」嘅階段呀？人類成為咗我哋眼中嘅成年人之後，好多時都問自己：
「我人生有冇快樂？」
呢個問題係包含咗好多問題，第一樣就係我哋呢一刻有冇真正感覺快樂，但呢樣我可以答你，係無嘅。因為人嘅劣根性設定係貪新忘舊，愛新鮮感同埋善忘。所以基於呢三個出廠設定嘅情況下，就算係李嘉誠個仔，都總可以搵到呢個世界令佢沮喪嘅事。呢個係好合理，因為打爆機就代表住要熄機，即係對個世界厭倦，抑鬱症嚟嘅。
我哋先唔好講到咁高層次先，就講我哋平民百姓，大部份嘅人都係能力唔高，但貪心成性，慢慢就會喺佢平凡嘅生命入面感覺到唔快樂同失望，成日都會諗：
「點解我嘅生命會咁無色彩？」
我研究多年，終於都知道個原因，因為佢哋忽略咗人生入面最簡單嘅快樂。咩叫最簡單嘅快樂，就係你出廠時已經備有嘅能力，就好似你打機，個人乜衫都無著嗰時，隻手都會有支茅或者木條，俾你對抗所有敵人，包括壓力。
我就認為，呢類出廠就有嘅能力有幾樣，暫時得到本人認可嘅快樂就有
「急屎時可以立即有屎屙」
「頸渴時可以飲到一包維他奶」
「喺巴士瞓一場深層睡眠」
呢幾樣都係無成本，咁當然你可以話俾我知你連維他奶同巴士錢都無，我都無咩說話好講。但如果你有，而你又試過，你就知道人生嘅小確幸其實就係咁簡單，喺最簡單最單純嘅情況下，去享受你一份與生俱來就有嘅快樂。
與生俱來嘅快樂係最環保，我視之為「有機快樂」。我哋喺人世間追逐太多，有時好多快樂係自己以為快樂，純粹都係喺追逐中嘅成功感，而產生出嚟嘅存在感，我哋以為係快樂，但其實只係由自卑轉化而成嘅存在感。
買隻靚錶，買層豪宅又或者係娶一個顯赫家族嘅太太，呢一類咁偏鋒又的確係某啲人夢想嘅快樂，只會堆砌又唔肯定嘅快樂，又或者係一份存在感而出現嘅安慰。
唔明呀？急屎未呀？去廁所屙屎嗰時慢慢諗諗，但唔好坐咁耐，過度嘅快樂我怕你會變成痔瘡。
薛可正Facebook Page
http://www.facebook.com/sithoching