網上資料圖片
 
幾日前，喺FACEBOOK上面見到一個舊同學，將自己外公離開嘅消息公佈，心入面，有一種好難過嘅感覺。不過我無見過佢外公，甚至係呢位同學，都係一年見唔到一次。維繫住大家嘅，就只有細細個一齊讀書，嗰一份濃到不得了嘅兒時感情。
 
不過，我雖然無見過佢外公，但我細個成日都會聽到佢外公把聲。廿幾年前唔興電腦亦無手提電話，喺嗰個大家都仲好鍾意打電話嘅年代，我成日都會打電話俾呢位同學，聽到佢外公聲如洪鐘咁大叫：
 
「陳嘉敏，妳電話呀。」
 
你哋幾耐無聽過呢種叫聲？你哋幾耐無打電話去人哋屋企？幾耐無喺佢哋屋企人叫佢聽電話時，一路喺電話邊聽到佢行埋嚟拎電話，嗰一份期待佢一句「喂」嘅心情？
 
唔使一定要男女朋友先有呢種感覺，喺嗰一個仲係好享受固網電話嘅時代，呢份感覺係無嘢可以取替到。
 
陳嘉敏嘅外公，就係呢份回憶入面一個好重要嘅人物。我雖然無見過佢，佢都應該唔太記得我呢個成日打俾佢孫女嘅男同學，但佢一直留喺我腦入面，一直都無離開過。人同人之間嘅關係就係咁有趣，雖有深淺，但唔代表呢種交集唔重要，喺呢度我希望外公可以安息。
 
周小明好好人嘅阿婆、張志強好惡嘅老豆、何莉莉嗰個一聽到男同學就收線嘅媽咪，仲有金仔屋企嗰一個一聽到我把聲就會不停問侯我，問我冬天夠唔夠衫著，夏天有冇食生果嘅嫲嫲，唔知道你哋宜家好唔好，過成點，屋企仲有冇留起當年嗰一個電話？
 
每次諗起呢啲回憶都覺得好珍貴，唔用咁矯情嘅方法記低，都唔知仲可以點表達。睇到呢度嘅你，記唔記得以前溝女同學時，第一次打電話去佢屋企搵佢時嘅情況？
 
薛可正Facebook Page
http://www.facebook.com/sithoching

Uncategorized 個回應 | 4,861 個已瀏覽 |