男人的Fantasy (一六九)如果我住劏房
網上資料圖片
睇完一條新聞片之後，我突然間進入咗自己嘅八奇思考領域，正所謂人有三衰六旺，如果有一日我要住一間得80呎，洗煮食屙都要屈喺一個馬桶上面，打開隻窗只係見到天井後巷嘅劏房，我會變成點樣？
我，應該點樣自處？
新聞片入面主人翁，因為年輕時照顧父母而無晒積蓄，依家靠一份保安收入嚟維持生活。我見到佢返屋企嘅情況，我就開始諗，如果以我身型，要瞓喺一個兩隻手伸直都唔可以嘅房入面，我一定會覺得好壓抑好辛苦。
食飯、睇電視、煮飯同瞓覺都係同一張木板，每一晚入睡時我會諗啲乜嘢？我會唔會失眠，如果失眠時我想坐起身，發覺跟本就唔夠位我坐，我仲可以有啲咩選擇？
如果人去到呢個谷底，我應該點樣說服自己，我嘅一生唔會咁易完結，我仲可以有我嘅將來？定係呢間劏房仲未係我人生低谷，我仲有可能過得更差，生活覺得仲壓抑？
當我諗緊人點樣面對逆境，新聞片入面嘅主角，比起我更加輕描淡寫。屋企無位就去公園坐，佢仲帶少少自嘲咁話：「我閒閒地坐兩個鐘都唔係問題，哈哈。」
搵萬幾蚊人工，每個月仲會儲錢，為嘅就係自己真真正正可以搵返一個更好嘅將來。以前點解會行到今日呢一步好似唔太重要，因為點諗都好，你都畢竟已經嚟到呢一步，「未來才是最重要的」呢啲老生常談就好似「船到橋頭自然直」，係老話，係廢話，老廢話，不過係真理，係經常出現喺大家身邊嘅金科玉律。
如果我住劏房，我一定唔煮飯，因為煮得唔太好味，間房又要置好多煮具，既然係咁，不如索性日日出街食，俾多少少地方自己瞓覺仲好。我或者會有一個位俾我叉電，叉電話叉電腦，一地都係線，好懶唔執，咁又霸咗兩呎去。
咁我點洗衫？日日都要拎去樓下洗咪好煩？冬天好潮濕我咪要貼住一度滴水嘅牆瞓？成間房咪會有一浸霉味，我個衫同個身咪都會有呢一種味……………
做人真係要居安思危，有好多人想努力但無機會，如果你哋有機會努力，要好好珍惜，因為你永遠唔知道聽日我哋條路要點行。
薛可正Facebook Page
http://www.facebook.com/sithoching