男人的Fantasy (一七零)比較是魔鬼
網上資料圖片
人去到某一個年紀，只可以揀適合自己嘅嘢。因為去到某一個階段，你會發現所有曾經追逐過嘅事，都只會留喺「曾經」，可以留得低嘅，好多時已經物是人非。
你追逐過名，喺一間大公司入面同另一個對手鬥過你死我活，每日工作十五小時，不眠不休付上幾年時間，最後你得到自己想要嘅位置。同你鬥過要生要死嘅對手老早就俾你趕走咗。
你得到名，你覺得非常有成就感，可惜你開始發現阿仔唔係太同你傾偈；阿女升中學，不過你唔知道佢間中學喺邊度，有一日一家人一齊食飯，就喺某一秒定格入面，你見到兩個仔女只對老婆講笑，同你反而有一層似是而非嘅隔膜，你唔使懷疑，因為過去幾年你得確無將時間放喺佢哋身上。
時間過咗，就係已經過咗。
你渴望利益，因為你出身窮苦。十五歲就搵兩份兼職嘅你，自步出社會就只諗到點樣搵錢。你好聰明，慢慢你由屯門住到去銅鑼灣Apartment，最後喺半山，你用八萬蚊一個月租咗一個一千呎單位。
就喺你坐住啱啱用三百萬買返嚟嘅靚車入面，你收到一個喺大陸打嚟嘅電話，兩年無見你嘅爸爸因為急病，離開咗呢個世界，離開咗你。
你好孝順，但每個月四萬蚊嘅家用，最後都唔可以將佢留喺呢個世界多一分鐘。
你覺得好傷心，喺蘭桂芳買醉，就喺你飲到接近不醒人事之前一分鐘，你見到當年俾你逼走嘅公司對手，佢拖住個仔同老婆，好開心咁喺中環行過，佢面上嘅笑容，係你近幾年都未曾擁有過。
然後你，又坐喺蘭桂坊十字路口，離十呎遙望住你架價值三百萬嘅靚車。你望住佢十五分鐘，但佢最後都係無同你講過一句說話，因為死物永遠都係死物。
呢一刻，你輸咗，如果呢一世都企唔返起身，你就係輸咗一世，呢個到底係一個咩概念？我認為，係一個「公平」嘅概念，每個人有生亦有死，你有高峰時我亦有低谷，我哋從來都唔需要乜嘢對手乜嘢假想敵，因為只要有比較，我哋個心入面就會有魔鬼；我哋可以有追求，但唔可以有魔鬼，因為魔鬼代表毀滅，魔鬼代表消失。
我哋每一個人都係活在當下，回憶帶唔走，未來看不見，唯有喺當下你先可以僅僅觸及，生命無力大概亦係如此。
好多人問自己點解成日都唔快樂，試吓將魔鬼先拎開，睇睇唔將比較放第一嘅你，個天會唔會變成藍色。
薛可正Facebook Page
http://www.facebook.com/sithoching