男人的Fantasy (一七二)佛系作家
網上資料圖片
最近好興佛系，意思就係咩都唔做，坐喺度等緣份到，聽落好似好消極，但諗諗吓其實又未必。
就好似以我做寫作為例，長期一個人工作，我任你諗到乜嘢絕世好橋，你都只能一個人去享受。因為諗到好橋只係個開始，跟住點樣寫返三五七萬字去完成呢條好橋，先係最難嘅地方。個過程冇人會幫到你，你唔可以亦無可能向外求，非常孤獨。
到寫完本書，出書之時，假設你好好運本書好受歡迎，當遇到讀者時佢好開心咁走埋嚟同你講
「我有睇你本書呀。」
「多謝你。」
「你寫得好好呀。」
「哈哈，多謝你。」
「幾時會再寫呀？」
「啱啱捱完十幾萬字你咁快問我幾時再寫？」呢句就心諗啫，呢句先係真
「好快喇，哈哈，多謝。」
跟住，就好似曾路得首歌咁，我哋已經唔知講咩好。可能係我個人其實唔外向，唔知點解每次有人兜口兜面同我講「我有睇你本書」我都係唔識答佢。
我研究咗好耐，我發現好多中途出家嘅作家都係咁樣，不擅詞令唔識交際，慢慢個人會愈嚟愈摺。就算俾你出到三兩本書係反應好，出版社想搵你做多少少同讀書見面嘅聚會，你都會慢慢咁猶豫，因為自己信心本來就唔大。
加上讀者好多都無咩忠誠度，又或者可以講佢哋唔需要。所以當你有一兩本書紅完之後，你嘅注目度就會降低。再無咁多尖叫聲時，你就會開始愈縮愈後，開始連出版社都唔交際。內心有超強嘅自卑感，覺得其實人哋都唔係好需要你。
就係呢一種狀態，個人愈來愈無自信，慢慢開始連最鍾意玩嘅專頁都無嘢講，一個月先出一兩個帖，仲要係廣告嚟。咁樣點會做得好，慢慢連個專頁都唔喜歡我哋，出咩帖都無咩人睇，谷底再向下，原來仲有谷底。
就係咁，唔諗新故、唔交際、唔見讀書、唔玩專頁，一日到黑發呆，唔知喺度等咩，緣份到咗，自然會有第二本爆紅嘅書。
呢個就係一個佛系嘅網絡作家。
睇到呢度如果你覺得我哋好慘，以後我哋出書時，麻煩幫我哋做多啲介紹俾其他人，日日喺FACEBOOK放我哋本書出嚟大叫「好好睇」叫到我滿意為止。出街時行到悶就逐間書局問吓有冇我哋嘅書，如果有嘅問佢點解唔放個當眼嘅位，如果書都無晒就問佢點解唔入。
只要你哋俾心機咁做，就可以救到我哋一班佛系作家，阿彌陀佛。
薛可正Facebook Page
http://www.facebook.com/sithoching