男人的Fantasy (一七三)肥仔做運動
網上資料圖片
成日都話人到咗一個年紀，點都要做返小小正事係咪？呢句說話我講就講得多，最近終於都的起心肝去做返一件需要做嘅事。
呢件事，叫運動。
首先講明先，我係一個肥仔嚟，係由細肥到大，唔算好肥但又唔會覺得係瘦嗰一類。有口德嘅朋友會話我係「大隻」，賤少少嘅會形容我做「大件」，最賤同時亦都係最多人做嘅係多數直接叫「肥仔」，不過叫咗三十幾年，慣哂。
要做運動要減肥，其實唔係因為怕俾人叫「肥仔」。而係年近四十，開始學識愛身邊嘅人，先唔好講到俾咩錦衣玉食佢哋，最基本俾一個好嘅身體去陪住佢哋，已經係最好嘅表達。
但個人懶就係懶，由我諗自己要做運動開始，我第一樣就係諗去邊度買一個跑步時可以裝住我電話嘅套。你知啦，一個人跑步好悶架嘛，仲要無嘢分散嘅話，強大嘅信心好快就會支撐唔到，所以我第一件事就去買個電話套。
點知行完又行搵完又搵，單單係浪費喺呢個電話套上面，我已經用咗成個月時間，去咗好多運動店都搵唔到，呢個時間我有一個覺悟
「可能係個天唔想我運動，話唔埋可能跑跑吓心臟病發或者俾個女司機成架車剷上行人路撞死，一定係咁。」
正當我個智志力一鬆，覺得個天唔想我跑嘅時候，個天真係俾反應我，佢叫我唔好亂講，上天有好生之德，拯救一個肥仔變肥豬咁有功德嘅事佢又點會唔鼓勵呢？
就喺嗰晚，我行行下信和，睇緊公仔書之際，無啦啦俾我喺一間電話舖入面見到我想要嘅電話套，仲賣三十蚊兩個。
「老闆俾兩個我，一黑一白丫。」
就係咁，我就開始咗我嘅跑步旅程。我首先計劃自己第一晚跑兩公里先，因為啱啱跑返，唔想操得太勁。我Download完個跑步App，計算好行程，著埋對洗到乾乾淨淨嘅跑步鞋，大叫一聲就開始跑。
良好嘅天氣、積極嘅心態加上整齊嘅裝備，最後我跑咗大約700米就停低。無睇錯，係700米。唔知係咪我開始跑時跑得太快，我真係跑到700米就跑唔到落去。周杰倫首「等妳下課」都未播完，我就下咗課先。
「薛可正你係廢柴」呢個諗法開始圍繞住我，平時我見個師奶都閒閒哋跑半個鐘，我宜家幾嘢就無課，我點接受得到!!!
由嗰日開始，我每日都跑，由700米跑到1700米，最近慢慢進步到3700米……
雖然好多人眼中，呢個仲係一個微不足道嘅距離，但對於我呢個腳傷嚴重同時懶根更嚴重嘅人嚟講，可以搵到一樣訓練恆心嘅事已經好難得。我好享受一路聽歌一路跑步嘅私人空間，雖然偶爾會有啲意想不到嘅事發生(例如比狗追)。每日有一點點嘅進步，唔使望住太強大嘅目標，滿足到自己就已經好過癮。
肥仔做運動，其實就係咁簡單。
薛可正Facebook Page
http://www.facebook.com/sithoching