男人的Fantasy (一七四)金像初見
網上資料圖片
第一次進入金像獎會場，心情完全可以用「爽」嚟形容。首先我要澄清，我唔會諗下一年自己有冇可能參與到金像獎，開心亦唔係因為我憧憬自己可以喺呢個舞台上面擁有啲乜，開心只係單純地，可以接觸到一個一直都好想觸摸到嘅舞台，那怕只係一個小觀眾。
另一個好想入場嘅原因，係因為「起底組」有三位成員都有份提名角逐，用朋友身份去睇朋友拎獎，都係一個有型嘅事嚟。金像獎前席，我分別向鄧麗欣、鄧月平同我嘅攝影師譚運佳送上祝福，莫論結果如何，佢哋喺我心目中都係最好。
行入會場，衣香鬢影。著到好似出旺角睇戲嘅我當然搵個地方匿埋先，不過見到好多人情百態，都幾過癮。最開頭當然會見到一眾紅星，佢哋一出場就前呼後擁，粉絲們大叫嘅大叫，缺氧嘅缺氧，明星就係需要呢份支持，你哋唔瘋狂，佢哋就搵唔到自己存在嘅價值。
我又見到一啲電影圈邊緣人，一日到黑都話自己有十幾套戲要開，但次次見親佢，唔係以記者身份去食人哋嘅慶功，就係見到佢喺電影閃過三幾秒，然後再睇到佢放喺Facebook不斷重覆。
又再有一啲朋友，根本同電影圈係沾唔上關係，頂多都係監製個朋友嘅朋友個朋友，但依然著得隆重過周秀娜，仲俾我見到佢扮唔小心行入紅地毯，超級興奮咁向兩邊好多記者揮手。我聽到有記者問：「呢個阿姐邊個嚟？」無人答佢，其實已經無人需要答佢。
呢幾種場面，見慣不怪，亦無好壞之分。行入電影圈呢段時間，令我最大啟發就係，唔好死。
要喺電影發展，你堅持唔好死就得。係咪好熟面口嘅情節，係咪諗起喜劇之王入面個周星馳？呢個圈子一日一個朝代，只要你唔死，唔知邊一日你就可以憑一個你自己都諗唔到嘅原因大紅，當然我係講可能啦。
用心做好自己嘅事，再堅持自己唔好死，你總可以喺電影圈入面，做到自己想做嘅事。我想做一個講故仔嘅人，無論係編劇定係導演，或者係用文字定鏡頭去影響人，呢個工作都係我一直都好想做嘅事。
行入金像獎，我視為探索電影圈最後一步，往後唔再係無見識嘅新人，所有事都要自己處理。
最後，我三位好朋友都唔可以得獎，但唔緊要，大家一齊再努力，唔死就得架喇。
薛可正Facebook Page
http://www.facebook.com/sithoching