男人的Fantasy (一七五)你唔搵敵人，敵人都會嚟搵你
網上資料圖片
阿爸以前教落，識人好過識字，朋友一句說話，好過你讀十年書。我信呢句嘢信到十足，所以由細到大出嚟做嘢，朋友叫到嘅，除咗要我獻身之外，好多時我幫到都會幫。
由以前開舖頭，日日落街市同魚佬菜佬打關係，佢哋有咩頭頭尾尾賣唔出嘅貨，我能力要到嘅都一定會幫佢哋買咗佢。好快我就知道阿爸教嘅永遠都有用，魚佬轉頭就拎住啲急凍龍蝦出嚟，話邊間邊間酒店停電死咗批海鮮，急凍咗市價兩折出售。我唔知幾多次，靠呢啲海鮮搵到我嗰個月嘅舖租。
到出咗嚟寫嘢，隔行如隔山，個人就更加要識做，出到嚟可以認識嘅朋友，我好多都會最客氣最好笑容去面對，無非都係怕對方誤會我臭串，一個唔覺意樹敵就無謂。
但後來有位同行，其實都唔知算唔算同行，反正都係寫故佬，令我深深明白到，唔好以為烚熟狗頭就唔會無敵人，你唔搵敵人，敵人都會嚟搵你。
對於寫手層面嚟講，對方都的確係一位人物嚟。最起碼佢粉絲多過我，玩Social Media係好過我好多。喺我哋有可能見嘅第一次地方，係一位朋友向老闆嘅吹雞大會，叫得吹雞大會即係朋友一早就出盡力咁請佢心目中可以嚇得吓老闆嘅人嚟，小弟有幸，同時亦知道寫手同行會到。當時我有多少期待，諗住去到有位熟人傾吓，時間都好打發少少。
點知最後寫手同行no show，我失望咁問朋友，點解佢唔嚟。朋友天生直腸直肚：「唔知呢，佢好似聽到你會嚟佢就唔嚟。」
我打咗個突，覺得係朋友講笑，但好快我又有機會同寫手同行有第二次交手機會。話說我同佢，被同一位朋友邀請寫序，我寫完交俾出版社後，我就收到書嘅作者話我知，原來寫手同行好唔滿意同我嘅序出現喺同一本書度，仲有啲微言話如果搵我就點解搵佢，我當然傷心到唔知點形容，你條小契弟真係＂不知那來的勇氣＂，將自己睇得咁高。
最後當然不了了之，但我亦都知道呢個人嘅敵意，無再用老豆嗰套識人好過識字嘅態度對之。喺耐唔耐睇吓佢嗰種懶係曲高和寡，一面扮唔想高調，一面將生活屙條屎長啲都拎出嚟分享嘅脫俗，有時都幾賞心悅目。
早段時間同行關公搞得一般，俾一堆人圍到飛起，我一邊睇，一邊食花生，再一邊諗返佢串其他人得米五高都學人出書，我就感覺到，呢個世界真係唔需要對每一個人都咁好。
無咩好處。
薛可正Facebook Page
http://www.facebook.com/sithoching