網上資料圖片
 
執筆時，利物浦事隔十一年，又一次打入歐聯決賽。
  
唔係球迷根本唔會知咩叫歐聯，同時唔係利迷，根本就好難明白呢一份心情。我係一個廿五年嘅利迷，由九十年代中期開始鍾意利物浦，咁啱俾曼聯七小福冒起食住，年年雙紅會，個心都會覺得和係美滿，嬴到係奇蹟。
 
我知咁樣講會有好多利迷插我，但呢個的確係當年我嘅感覺。經歷二十幾個英超寒暑，由曼聯冒起到阿仙奴分庭抗禮，見証過曼聯奇蹟反勝拎三冠，接住一堆群雄割據，最後係摩連奴拎住油王張無銀碼支票一統江山。
  
雖然經歷過一次三冠，但大家都明白當年呢個次一級嘅三冠其實純屬鼓勵，放喺真正經典之前，多少都有啲蒼白無力。但其實我唔太介意，做利迷，同有冇冠軍，唔會係一個最大嘅快樂因素。
 
仲記得2005年5月嗰一晚，我哋對AC米蘭嘅一場比賽。對手係舒夫真高同馬甸尼級數嘅陣容，我一如以往嘅平常心去睇呢場比賽，最後我經歷咗一場經典。
 
拎咗歐聯，無對我哋喺英超賽場上有太大壓倒性優勢，然後我哋又喺我哋嘅英超上走過十幾年。我哋擁有過托利斯、蘇阿雷斯同古天奴呢幾位世界一級球員，我哋試過同英超冠軍無限接近，我哋亦親眼睇住隊長謝拉特一腳跣走咗個冠軍。
 
幾年之後，我哋又返到去歐洲最高舞台嘅決賽上面，利物浦對我哋利迷嚟講，根本就係一個人生，亦係一個世界。高高低低，每一次高峰都係刻骨，每嬴一場波都會令我哋腎上線直標；到輸波時總係傷春悲秋，總係有好多氣餒。
 
但從來，我哋都無放棄。
 
我永遠都相信，喺最艱難時堅持嘅事，最後可以帶俾你嘅快樂，係雙份。
 
五月二十六號晚，我怕輸，但我唔會放棄。
 
薛可正Facebook Page
http://www.facebook.com/sithoching

Uncategorized 個回應 | 5,132 個已瀏覽 |