男人的Fantasy (一七七）斷捨離
網上資料圖片
最近見FACEBOOK好多人講斷捨離，一個二個師奶都放自己啲衫褲鞋襪上去，再將斷捨離講到好似修行咁，實際就只係將啲舊衫唔要，搵返啲位出嚟再買過啲新嘅。
個個都要做到斷捨，但其實連FACEBOOK上面嘅讚好同光環都做唔到呢點，搞笑。
但講開呢個題目，我都認為如果你可以確切咁去執行，的確係一個修行嚟，特別係對我哋嘅人生。
因為世界太大，我哋嘅時間太小。
人生頭三十年我認為係犯錯嘅時候，盡快犯錯再盡快改過，因為有好多錯，係你喺三十歲後犯唔起。因為頭三十年就算犯再大嘅錯，人生七十古來稀，我哋起碼都仲有四十年時間去追悔同改過，就算追唔到改唔正，喺呢個修正嘅道路上，都總可以得著不小，感覺到自己嘅進步。
但呢種犯錯，唔一定係做一件錯事。呢種錯，可以係開始錯一段關係，追求錯一個目標。本質無錯，但對象係錯。
常言人生有太多過客，我認為大部份都係嚟自呢啲唔應該發生嘅相遇。「對的時間遇上錯的人」我認為係廢話嚟，如果係錯的人，就咩時間遇到都係錯。一樽過期腐乳幾時食都係過期，你永遠唔會搵到一個時間食，而佢會變返唔過期。
所以一生人入面，實在有太多呢啲唔應該出現但偏偏又出現咗嘅關係，出現嘅時間又可能巧合地遇上你嘅低潮，令你錯覺呢一段係稱身嘅感情。不過到咗一段時間之後，唔稱身嘅關係始終都會出現佢嘅問題，又或者唔稱身，本來就已經係一個問題。到咗呢個時間你就會好糾纏，到底我哋應該為繼續而繼續，還是果斷咁作出斷捨離？
我會選擇後者，因為就好似開首咁講，我哋嘅時間太少，但世界太大。世界唔會讓你，如果巨輪輾過，只可以由我哋自己去適應。如果身上放得太多唔稱身嘅嘢，走起路上嚟你都唔會夠瀟灑，步履唔會夠輕快。
那怕係親情、愛情定係友情，將好嘅放喺身邊係一種動力，如果唔稱身嘅留太耐，只會係一種無意思嘅牽絆。將感情好好保存，有發生過，已經係世界上另一種風景。
薛可正Facebook Page
http://www.facebook.com/sithoching