男人的Fantasy (一七八)總有一個唔喺左近
網上資料圖片
細個覺得，離鄉別井係一件好遙遠嘅事，每一次見到媽咪同爸爸嘅朋友由外國返嚟，我都會對佢哋充滿好奇。媽咪有一個姊妹，好後生就嫁咗去德國，每一次佢返香港，都會俾一百蚊利是我，三十年前對一個八歲嗁小朋友嚟講，一百蚊係一筆橫財，所以我成日都會諗，呢一位嚟自德國嘅姨姨，喺德國到底係點樣生活。每一次佢返嚟，都會喺我哋屋企，媽咪同爸爸都會好開心咁招呼佢，我成日都諗，大家一兩年先見一次，咩話題都無哂，點解仲好似好好朋友咁？
直到喺我成長嘅過程入面，我終於遇到有朋友要出國，我開始了解到，媽咪當日對德國姨姨呢份友誼，到底係點樣維繫。
近年都好流行Working Hoilday，可惜我到三十歲後先認識呢件美事，令我唔可以好似我班朋友咁一個個去唔同地方見識。我有個朋友聰仔，雖然唔係由細識到大，但感情都幾咁要好，2013年佢同我講要去澳洲，我仲同佢講見識吓都好。佢個人平時唔太積極，但當年去澳洲呢單嘢佢就非常快咁處理哂所有手續，由佢同我講要去，直到佢上飛機，我覺得係好快嘅事。
我哋平時成日一齊踢波，仲記得佢走之前，同佢喺大環山球場踢波，影完張相大家真係要散時，男人老狗講唔出太多肉麻說話，唯一係想佢快啲返香港，好怕自己唔習慣無佢一齊玩嘅日子。
開頭以為佢會去一年好快過，點知澳洲嘅生活真係太適合佢，佢去吓一年，去吓又一年，最後由2013年到今年2018年都未返。我由好唔習慣佢唔喺香港，到宜家習慣咗每年有一個月時間盡量唔約朋友，就係等佢返香港陪佢去玩。
早幾年會成日鬧佢，做咩一個人去到澳洲，但慢慢先明白，每個人都想有自己嘅方式生活。唔一定係最有將來，但肯定要係自己最舒服。所有關係都係，如果暫時不在同途，大家都只可以喺自己嘅地方好好咁祝福對方。
直到宜家，每一年佢返到嚟嘅一個月都會有唔同意義，從前嘅一班朋友會見面多咗，鬧交少咗，感情都好似好咗。雖然大家講嚟講去都係十幾年前嘅事，現階段生活已經各有不同，但唔緊要，只要維繫到，咩方法都會係一個好方法。
望住聰仔，令我開始諗返，細個時媽咪見到德國姨姨返香港嚟我哋屋企嘅嗰種表情，就係老朋友再見面，盡力不言中嘅表情。
薛可正Facebook Page
http://www.facebook.com/sithoching