男人的Fantasy (一七九) 男人不老
網上資料圖片
最近過咗生日，唔經唔覺唔到自己唔認，下年就齊頭四十。曾經我以自己係末代七十後而遺憾，因為只要再多半年，我就可以係一位曾經被標籤成「偏激、愛自主」嘅八十後，我覺得人生就係需要口號，只要信念，先可以令到好多事改變，
包括變老。
但去到呢個年頭，八十後都開始跟住我踏入四字頭，我人生要再搵一個口號，先可以俾我保持住心境嘅年青。男人去到三十幾四十係最悲哀，因為多數呢個年紀你已經處於一個主導位置，一家大細都睇你頭，稍稍有啲能力已經做到管理級，全個世界都要你去打理，變成全個世界都唔會明白你。明白你都係一個人；明白你亦會有攰同想放棄嘅時候。
人喺最無方向嘅時候，我多數都會選擇返去原點，因為原點係最安全同最熟悉嘅地方。所有人嘅原點，都係佢嘅童年。喺呢個階段你可以搵得返信心，同搵得返快樂，所以無論你人生去到邊一個階段，你都唔可以放棄兩樣嘢，童年時嘅朋友，仲有童年時最愛嘅娛樂。
我童年娛樂就係打機，由細到大只有打機先可以令我沉迷。十年前，當我開始做爸爸時，我突然有一個諗法，我唔可以再好似細路仔咁，我要做一個成熟嘅爸爸，最後我選擇將打機呢個嗜好戒走。
最初其實係影響唔大，但慢慢你嘅世界入面，因為無咗打機而騰空嘅位置都被你工作或者家庭佔據，當你嘅生活入面只有責任，你會慢慢發現，你唔見咗一個可以透氣嘅位。放心，無咗呢個透氣嘅位唔係真係會令你窒息，唔會即時缺氧死，不過遲啲就唔知喇。
經過幾年折騰，將啲所謂嘅「責任」同「成長」玩嚟玩去，我終於明白，一個人嘅成長，係唔需要放棄任何一樣嘢去換取。然後我開始大模廝樣咁沉迷打機，又瘋狂咁約細個班朋友踢波，喺過程入面，我發覺自己好似無之前幾年咁攰，人生開始有返方向，唔係一直咁做做做做做同責任責任責任。
永遠玩嘅時間做一個小朋友，工作時又變返一個大人，呢種平衡，遠比你去單方向死衝爛衝溫和得多。只要咁樣，你先可以一直感覺年青，一直享受年青。
薛可正Facebook Page
http://www.facebook.com/sithoching